სამართალი

სმიტების ოჯახის მკვლელობაში ბრალდებული მალხაზ კობაური სასამართლომ პატიმრობაში დატოვა

მცხეთის რაიონული სასამართლოს გადაწყვეტილებით, სმიტების ოჯახის მკვლელობაში ბრალდებული მალხაზ კობაური პატიმრობაში რჩება.

მოსამართლე ვაჟა ფუხაშვილმა მალხაზ კობაურის ადვოკატების მოთხოვნა, აღკვეთის ღონისძიების შეცვლაზე არ დააკმაყოფილა, ვინაიდან, მისი თქმით, არსებული რისკები არ შემცირებულა, პირიქით, გაიზარდა კიდეც.

სმიტების ოჯახის მკვლელობაში ბრალდებულ მალხაზ კობაურის სასამართლო პროცესი მცხეთის რაიონულ სასამართლოში დღეს გაიმართა. საქმეში არსებული სქესობრივი დანაშაულის ნიშნებისა და არასრულწლოვნის გარდაცვალების ფაქტორის გამო, მოსამართლემ პროცესი დახურა.

ცნობისთვის, 19 წლის მალხაზ კობაურს განსაკუთრებული სისასტიკით ჩადენილი განზრახ მკვლელობა ედება ბრალად. საუბარია ხადას ხეობაში ამერიკისა და საქართველოს ორმაგი მოქალაქეების, რაიან და ლორა სმიტებისა და მათ ოთხი წლის შვილის მკვლელობაზე.