პოლიტიკა

სოფიო ქაცარავა გერმანია-სამხრეთ კავკასიის საპარლამენტო მეგობრობის ჯგუფის ხელმძღვანელს შეხვდა

საქართველოს პარლამენტის დელეგაცია ევროპის საბჭოს საპარლამენტო ასამბლეის ზამთრის სესიაში მონაწილეობის პარალელურად, მაღალი დონის შეხვედრებს მართავენ.

სტრასბურგში ვიზიტის ფარგლებში, საქართველოს პარლამენტის საგარეო ურთიერთობათა კომიტეტის თავმჯდომარე, სოფიო ქაცარავა, კომიტეტის თავმჯდომარის მოადგილე, დიმიტრი ცქიტიშვილი და კომიტეტის წევრი, ზვიად კვაჭანტირაძე გერმანია-სამხრეთ კავკასიის საპარლამენტო მეგობრობის ჯგუფის ხელმძღვანელს კარინ შტრენცს შეხვდნენ.

შეხვედრაზე, მხარეებმა როგორც ქვეყნებს შორის ურთიერთობების გაძლიერებაზე ასევე, საპარლამენტო დონეზე ურთიერთობების გაღრმავებაზე ისაუბრეს. მათ მეგობრობის ჯგუფის ფუნქცია-მოვალეობები განიხილეს და კონკრეტული გეგმებიც დასახეს.

მხარეებმა, აპრილში, საქართველოში დაგეგმილი მეგობრობის ჯგუფის ვიზიტზეც ისაუბრეს.

საქართველოს საპარლამენტო დელეგაციის შემადგენლობაში, თამარ ჩუგოშვილთან ერთად, სოფიო ქაცარავა, დიმიტრი ცქიტიშვილი, ნინო გოგუაძე, ირინე ფრუიძე, ზვიად კვაჭანტირაძე, ეკა ბესელია, გიორგი კანდელაკი და გელა მიქაძე შედიან.