პოლიტიკა

სოფიო ქაცარავა ჰერბერტ ზალბერს შეხვდა

საგარეო ურთიერთობათა კომიტეტის თავმჯომარემ, სოფიო ქაცარავამ, სამხრეთ კავკასიაში და საქართველოში კრიზისის საკითხებში, ევროკავშირის სპეციალური წარმომადგენელი, ჰერბერტ ზალბერი მიიღო.

საქართველოს პარლამენტის ინფორმაციით, მხარეებმა, საქართველოს ოკუპირებულ ტერიტორიებზე არსებულ მდგომარეობაზე, ქვეყნისა და ოკუპირებულ ტერიტორიებზე სტაბილურობასა და მოქალაქეების უსაფრთხოებაზე ისაუბრეს.

შეხვედრაზე ჰერბერტ ზალბერმა კიდევ ერთხელ აღნიშნა, რომ ევროკავშირი მხარს უჭერს საქართველოს სუვერენიტეტსა და ტერიტორიულ მთლიანობას.

„ვაფასებთ ევროკავშირის მხარდაჭერას საქართველოს სუვერენიტეტისა და ტერიტორიული მთლიანობის მიმართ. ასევე, მათ მონაწილეობას კონფლიქტის მშვიდობიანი დარეგულირების საკითხებში. ერთმანეთს გავუზიარეთ სამომავლო ხედვები და იდეები ჩვენი ქვეყნის კონფლიქტის მშვიდობიანი გზით დარეგულირების შესახებ“, - განაცხადა სოფიო ქაცარავამ.

საგარეო ურთიერთობათა კომიტეტის თავმჯდომარემ სტუმარს, პარლამენტის ახალი შემადგენლობის მიერ მიღებული საგარეო პოლიტიკის რეზოლუცია გააცნო, რომლის მთავარ მიზანს, საქართველოს ევროატლანტიკურ სტრუქტურებში გაწევრიანება, საქართველოს სუვერენიტეტი და ტერიტორიული მთლიანობა წარმოადგენს.