პოლიტიკა

სოფიო ქაცარავა ინდოეთის ელჩს იუგეშვარ სანგვანს შეხვდა

პარლამენტის საგარეო ურთიერთობათა კომიტეტის თავმჯდომარემ სოფიო ქაცარავამ გაცნობითი შეხვედრა გამართა ინდოეთის ელჩთან საქართველოში (რეზიდენციით - ერევანი, სომხეთი), სადაც ორმხრივი ურთიერთობების გაღრმავებასა და საპარლამენტო თანამშრომლობის გააქტიურებაზე ისაუბრეს. ელჩის თქმით, ჩვენს ქვეყნებს უდიდესი პოტენციალი გააჩნიათ იმისთვის, რომ ორ ქვეყანას შორის არსებული ურთიერთობები განავითარონ. მისივე თქმით, საქართველოს მხრიდან ორმხრივი თავისუფალი ვაჭრობის შესახებ მიღებული შეთავაზება ინდოეთის მთავრობის მიერ განიხილება, - აცნობეს მედიანიუსს პარლამენტიდან.

„ორ ქვეყანას შორის არსებობს აქტიური თანამშრომლობა მრავალი მიმართულებით, მათ შორის ეკონომიკური, კულტურული და საგანმანათლებლო მიმართულებებით. მნიშვნელოვანია საპარლამენტო ურთიერთობების გააქტიურებაც“, - განაცხადა საგარეო ურთიერთობათა კომიტეტის თავმჯდომარემ, სოფიო ქაცარავამ და მან ამისთვის სრული მზაობა გამოთქვა.

შეხვედრაზე, ელჩმა, საქართველოში ინდური კომპანიების მიერ ფარმაცევტულ ბაზარზე, ენერგოსექტორში, ტურიზმისა და სხვა სფეროში განხორციელებულ ინვესტიციებზეც ისაუბრა.