პოლიტიკა

თბილისის მერიის არქიტექტურის სამსახურის უფროსის ყოფილ მოადგილეს პატიმრობა შეუფარდეს

თბილისის საქალაქო სასამართლომ თბილისის მერიის არქიტექტურის სამსახურის უფროსის ყოფილ მოადგილეს ლევან ძაგნიძესა და კერძო არქიტექტორს ვალერი მიმინოშვილს პატიმრობა შეუფარდა. სასამართლომ პროკურატურის შუამდგომლობა დააკმაყოფილა.

ძაგნიძესა და მიმინოშვილს ბრალად ედება თაღლითური გზით დიდი ოდენობის თანხის მისაკუთრების მცდელობა.

პროკურატურის ინფორმაციის თანახმად, ბრალდებულებმა დიდი ფულადი თანხის დაუფლების მიზნით ერთ-ერთ მოქალაქეს შესთავაზეს, რომ ისინი შეძლებდნენ დიდი დიღმის ტერიტორიაზე მდებარე ოთხ სხვადასხვა მიწის ნაკვეთზე „განაშენიანების რეგულირების გეგმის“ შეთანხმებას. ამისთვის მოქალაქეს, ვითომდა მერიის თანამშრომლებისთვის გადასაცემად, ჯამში 38 000 აშშ დოლარი მოსთხოვეს. ბრალდებულები მართლსაწინააღმდეგო მისაკუთრების მიზნით, 2016 -2017 წლებში 15 000 აშშ დოლარს დაეუფლნენ და ცდილობდნენ შეთანხმებული თანხის დარჩენილი ნაწილის მოტყუებით მიღებას.

სასამართლოს განმარტებით, აღკვეთი ღონისძიების სახით პატიმრობის შეფარდება იყო განპირობებული ბრალდებულების შესაძლო მიმალვით, მოწმეებზე ზემოქმედებისა და მტკიცებულებათა განდგურების მცდელობით, ასევე გამოძიებაში ჩარევის საფრთხეებით.

საქმეზე წინასასამართლო სხდომა 2017 წლის 25 ოქტომბერს, 12:30 საათზე გაიმართება. აღნიშნული ბრალდებით სასჯელი ითვალისწინებს თავისუფლების აღკვეთას ექვსიდან ცხრა წლამდე.

ანა მებურიშვილი