სამართალი

თბილისის საქალაქო სასამართლოში ნიკა გვარამიას გამოკითხვა მიმდინარეობს

თბილისის საქალაქო სასამართლოში ტელეკომპანია რუსთავი 2-ის გენერალური დირექტორის, ნიკა გვარამიას გამოკითხვა მიმდინარეობს.

როგორც გვარამიამ გამოკითხვაზე შესვლამდე ჟურნალისტებს განუცხადა, მისი და მამუკა ახვლედიანის ჩანაწერი წაშლილია, რადგან ამის შენახვის აუცილებლობა არ არსებობდა. გარდა ამისა, გვარამიას თქმით, ის არ აპირებს დაასახელოს იმ მესამე პირის ვინაობა, რომელიც საუბარს ესწრებოდა. სამაუწყებლო კომპანიის გენერალური დირექტორისთვის გაუგებარია, რატომ გახდა მისი ხელმეორედ გამოკითხვა საჭირო.

”დიალოგი მიდის სამ ადამიანს შორის. მე ვიცი, ვის შორის გაიმართა საუბარი, მათ შორის, როგორც უკვე განვაცხადე, ერთ-ერთი იყო სახელმწიფოსთან დაახლოებული პირი. მის ვინაობას, მე ერთხელ უკვე ვთქვი, არ დავასახელებდი და ახლაც ასე ვაპირებ”, - განაცხადა ნიკა გვარამიამ.

ნიკა გვარამიას დაკითხვა სასამართლოში, მისი მოთხოვნის საფუძველზე ხდება. რუსთავი 2-ის გენერალურმა დირექტორმა, რომელიც შს სამინისტროს კრიმინალურ პოლიციაში იყო დაკითხვაზე დაბარებული, უარი განაცხადა ჩვენება შსს-თვის მიეცა და სასამართლოში დაკითხვა მოითხოვა. იმავე დღეს შსს-მ სასამართლოს ნიკა გვარამიას დაკითხვის შუამდგომლობით მიმართა.

ნინო ექვთიმიშვილი