საზოგადოება

თბილისის სატრანსპორტო კომპანია მეტროს თანამშრომლების მოთხოვნის საპასუხოდ განცხადებას ავრცელებს

თბილისის სატრანსპორტო კომპანია დამოუკიდებელი პროფესიული კავშირის „ერთობა 2013“-ის მოთხოვნას სახელფასო განაკვეთის 45%-ით გაზრდასთან დაკავშირებით განცხადებით გამოეხმაურა.

კომპანიის განცხადებით, ისინი არ განიხილავვენ დასაქმებულთა ცალკეული ჯგუფისთვის ანაზღაურების გაზრდას, ვინაიდან ეს გამოიწვევს სამართლიან უკმაყოფილებას სხვა თანამშრომლებში.

„თბილისის სატრანპორტო კომპანიაში დასაქმებულია 6300-მდე თანამშრომელი და მათი პირობების გაუმჯობესება კომპანიისთვის ერთ-ერთ პრიორიტეტულ მიმართულებას წარმოადგენს. ბოლო წლებში გადაიდგა ქმედითი ნაბიჯები დასაქმებულთა სამუშაო გარემოს გაუმჯობესებისა და შრომის უსაფრთხოების სტანდარტებთან შესაბამისობაში მოყვანისთვის.

კონკრეტულად, მეტროს მემანქანეებისთვის კეთილმოეწყო სპეციალური მოსასვენებელი ოთახები. ასევე თითოეულ მემანქანეს შესაძლებლობა აქვს აიმაღლოს კვალიფიკაცია ტექნიკურ სკოლაში და მიიღოს უფრო მეტი ანაზღაურება (სწავლის პერიოდში მემანქანე იღებს ხელფასს), თანრიგის ცვლილების შესაბამისად.

კომპანიაში დაინერგა წელთა ნამსახურეობისა და ღამის სამუშაოების ტარიფების ზრდა, რაც დადებითად აისახა თანამშრომელების შემოსავლებზე“-ნათქვამია განცხადებაში

თბილისის სატრანსპორტო კომპანიამ თვალსაჩინოებისათვის, 2013-2017 წლების მიხედვით, მეტროს მემანქანეების შემოსავლების ზრდის დინამიკა წარმოადგინა.

სატრანსპორტო კომპანია მოუწოდებს მეტროს მემანქანეების კონკრეტულ ჯგუფს უფრო მეტად გაითავისონ ის პასუხისმგებლობა, რაც მათ გააჩნიათ საზოგადოების წინაშე.

განცხადებაშივე ნათქვამია, რომ თავის მხრივ, სატრანსპორტო კომპანია ყველაფერს აკეთებს იმისათვის, რომ მემანქანეების გაფიცვამ არ გამოიწვიოს მეტროს გაჩერება და ქალაქის მუნიციპალური ტრანსპორტის შეფერხება.