საზოგადოება

თბილისის ვიცე-მერის თქმით, სანამ ფონიჭალაში ყველა საფრთხე აცილებული არ იქნება, აფეთქების შედეგად დაზიანებულ კორპუსში მცხოვრებლებს არ შეუშვებენ

თბილისის მერის მოადგილის, ირაკლი ბენდელიანის განცხადებით, ვიდრე ყველა რისკი თავიდან აცილებული არ იქნება, ფონიჭალაში, აფეთქების შედეგად დაზიანებულ კორპუსში მცხოვრებლებს არ შეუშვებენ.

მისივე თქმით, ექსპერტების მუშაობის დასრულების შემდეგ კორპუსის აღდგენა-გამაგრებითი სამუშაოები დაიწყება.

„მინდა, მწუხარება გამოვხატო გარდაცვლილების ოჯახის მიმართ. გუშინ დიდი ტრაგედია მოხდა.

რაც შეეხება ადგილზე არსებულ მდგომარეობას, იქ მიმდინარეობს საექსპერტო სამუშაოები. მუშაობენ როგორც შს სამინისტროს შესაბამისი დანაყოფები, ასევე ექსპერტიზის ეროვნული ბიუროს სპეციალისტები, რათა დაზიანების ხარისხი და შენობის ტექნიკური მდგომარეობა დროულად დადგინდეს. შემთხვევის შემდეგ ადგილზე ყველა კორპუსისთვის კომუნიკაციის შეწყვეტა მოხდა, მაგრამ დღის ბოლოს ბუნებრივი აირისა და ელექტროენერგიის მიწოდება უკვე აღდგენილი იყო. დღეს უკვე იქ იმყოფებიან კომპანია GWP-ის წარმომადგენლები. წყალმამომარგება უახლოეს პერიოდში აღუდგებათ. ასევე, დაზარალებული ოჯახები გამგეობამ გუშინვე გადაიყვანა სასტუმროებში. შესაბამისად, როგორც კი შესაძლებლობა მოგვეცემა, დედაქალაქის მერია თავის თავზე იღებს ამ კორპუსის რეაბილიტაციის შესაბამის ხარჯებს. როგორც კი დასრულდება შესაბამისი საგამოძიებო პროცედურები, ჩვენ მზად ვართ, რომ იქ აღდგენა-გამაგრებითი სამუშაოები დავიწყოთ. დარწმუნებული ვარ, ეს უახლოეს პერიოდში მოხდება“, - განაცხდა ვიცე-მერმა.

მისივე თქმით, გუშინ შემთხვევის ადგილზე იმყოფებოდნენ როგორც ექსპერტიზის ეროვნული ბიუროს, ისე თბილისის მერიის ლაბორატორიის სპეციალისტები, რომლებიც აღნიშნულ ფაქტს სწავლობენ.

მისივე თქმით, როგორც კი ექსპერტიზის დასკვნა მზად იქნება, აღდგენით სამუშაოებს დაიწყებენ.

გუშინ დილით ფონიჭალაში, #23 კორპუსის მესამე სართულზე, ერთ-ერთ ბინაში აფეთქება მოხდა, რასაც საცხოვრებელი კორპუსის მე-3 და მე-4 სართულებზე ნგრევა მოჰყვა.დაშავდა 4 ადამიანი. მათგან 3 უმძიმეს მდგომარეობაში დამწვრობის ცენტრში რეანიმაციულ განყოფილებაში მოათავსეს.

მაშველებმა რამდენიმესაათიანი ძებნის შემდეგ ნანგრევებში მოყოლილი დედა-შვილის ცხედრები იპოვეს. ექსპერტიზის შემდეგ დაღუპული დედა-შვილი ღამით ჭიათურაში გადაასვენეს. დაკრძალვის ხარჯების ანაზღაურება თბილისის მერიამ საკუთარ თავზე აიღო.

ერთადერთი ვერსიით, აფეთქება ბუნებრივი აირის გაჟონვამ გამოიწვია.