საზოგადოება

ტელეკომპანია „კავკასია“ უარს აცხადებს გაუგებარი ფორმატის შეხვედრაში მონაწილეობაზე - ნინო ჯანგირაშვილი ივანიშვილის შეთავაზებაზე

ტელეკომპანია „კავკასიის“ ხელმძღვანელმა ნინო ჯანგირაშვილმა არხის სახელით უარი განაცხადა „ქართული ოცნების“ თავმჯდომარის, ბიძინა ივანიშვილის შეთავაზებაზე, შეხვდეს ექს-პრემიერს სხვა მედიასაშუალებებთან ერთად.

ჯანგირაშვილის განმარტებით, ივანიშვილთან შეხვედრის ფორმატი მისთვის გაუგებარია.

„ტელეკომპანია კავკასიის განცხადება 26 ოქტომბერს ივანიშვილის ჟურნალისტებთან შეხვედრასთან დაკავშირებით:

ტელეკომპანია კავკასიისთვის გაუგებარია 26 ოქტომბრისთვის დაგეგმილი ბიძინა ივანიშვილის ჟურნალისტებთან შეხვედრის ფორმატი . თუ ეს შეხვედრა არის პრესკონფერენცია, ჩვენთვის გაუგებარია, რატომ არის შეზღუდული მასზე დასწრება სხვა მედიასაშუალებებისთვის, გარდა ხუთი ტელეკომპანიისა. თუ ეს არის რამდენიმე ტელეკომპანიის ტოქშოუების წამყვანების ერთობლივი კომბინირებული გადაცემა, როგორც ეს იყო 23 ოქტომბერს, ეს ფორმატი ჩვენთვის გაუგებარი და მიუღებელია. ვისთან ერთად სურთ ჩვენს წამყვანებს დაჯგუფება და გადაცემის წაყვანა, ეს მათი გადასაწყვეტია და არა ბიძინა ივანიშვილისა და მისი პიარსამსახურის. ასეთ ფორმატში იკარგება ინტერვიუს არსი, კითხვების თანმიმდევრობა, ლოგიკურობა და შესაბამისად, აზრს კარგავს კითხვის დასმა. მოხარული ვიქნებით, თუ ქართული ოცნების თავმჯდომარის პიარსამსახური უფრო მეტი პასუხისმგებლობით მოეკიდება დასახულ ამოცანებს, საკუთარ დამსაქმებელს , ქართულ მედიას და უფრო მკაფიოდ ჩამოყალიბებულ, აპრობირებულ ფორმატებს შემოგვთავაზებს თანამშრომლობისთვის, რათა აზრი არ დაეკარგოს ჟურნალისტის პროფესიულ საქმიანობას და რესპოდენტთან ურთიერთობა არ იქცეს არსს მოკლებულ გამაღიზიანებელ სანახაობად. ტელეკომპანია „კავკასია“ უარს აცხადებს გაუგებარი ფორმატის შეხვედრაში მონაწილეობაზე. მზად ვართ, დავესწროთ ბიძინა ივანიშვილის ოფიციალურ პრესკონფერენციას, სხვა მრავალ მედიასაშუალებასთან ერთად, რომლებსაც არაერთი კითხვა აქვთ ბიძინა ივანიშვილთან. ასევე მზად ვართ ერთი–ერთზე, კონკრეტულად ჩვენი არხისთვის განკუთვნილი ინტერვიუს ფორმატში შევხვდეთ ქართული ოცნების თავმჯდომარეს“, - დაწერა ჯანგირაშვილმა ფეისბუკის საკუთარ გვერდზე.

ბიძინა ივანიშვილმა 26 ოქტომბერს, 11:00 საათზე მაესტროს, ობიექტივის, პალიტრა ნიუსის, კავკასიისა და იბერიას ჟურნალისტები მიიწვია ინტერვიუზე. მან ასევე მიიწვია რუსთავი 2. ტელევიზიებს შორის ისევ არ ფიგურირებს საზოგადოებრივი მაუწყებელი.

23 ოქტომბერს ბიძინა ივანიშვილი სამი წამყვანი არხის - რუსთავი 2-ის, ტვ პირველისა და იმედის ჟურნალისტებს შეხვდა.