სამართალი

თემირლან მაჩალიკაშვილის ადვოკატს გაუთქმელობის პირობა ჩამოართვეს

სახელმწიფო უსაფრთხოების სამსახურის მიერ ტერორიზმში მხარდაჭერის ბრალდებით დაკავებული რუსლან ალდამოვისა და სპეცოპერაციისას დაჭრილი თემირლან მაჩალიკაშვილის ადვოკატს, მარიამ კუბლაშვილს გაუთქმელობის პირობა ჩამოართვეს.

კუბლაშვილის ინფორმაციით, ის სუს-ში იმყოფებოდა. მისი ვარაუდით, გაუთქმელობის ხელწერილი სხვა ადვოკატებსაც დაადებინეს.

ადვოკატის განცხადებით, სუს-ის მიერ გავრცელებული ვიდეოკადრებით არ დასტურდება დაკავებულების კავშირი ტერორისტებთან. მან განაცხადა, რომ მისი დაცვის ქვეშ მყოფ ალდამოვს გაბრიელ სალოსზე ჩატარებული სპეცოპერაციისას ერთ-ერთი ლიკვიდირებულის ფოტო უნდა აჩვენოს.

სუს-მა 2017 წლის 26 დეკემბერს 5 პირი დააკავა, აქედან 4 პანკისში, ერთი კი - თბილისში. ყველა მათგანს თბილისში, ბერი გაბრიელ სალოსის გამზირზე ჩატარებული სპეცოპერაციისას განეიტრალებულ პირებთან კავშირი და მათი დახმარება ედება ბრალად. პანკისში ჩატარებული სპეცოპერაციისას დაიჭრა თემირლან მაჩალიკაშვილი, რომლის მდგომარეობა ამ დრომდე უკიდურესად მძიმეა.