საზოგადოება

წელიწადში 40 000 ლარზე მეტი შემოსავლის მქონე პირები საყოველთაო ჯანდაცვის პროგრამით ვეღარ ისარგებლებენ - დავით სერგეენკო

ჯანდაცვის მინისტრმა დავით სერგეენკომ დღევანდელ ბრიფინგზე საყოველთაო ჯანდაცვის პროგრამაში შეტანილი ცვლილებები წარადგინა. ერთ-ერთი სიახლის მიხედვით, წელიწადში 40 000 ლარზე მეტი შემოსავლის მქონე პირები საყოველთაო ჯანდაცვის პაკეტით ვეღარ ისარგებლებენ.

მინისტრის თქმით, ინდივიდუალურად და არა ოჯახის შემოსავლის მიხედვით მოხდება იმის დადგენა, მიიღებს თუ არა მოქალაქე საყოველთაო ჯანდაცვის პროგრამით გათვალისწინებულ მომსახურებებს.

„მე, მაგალითად, 40 000-ზე მეტი შემოსავალი მაქვს, მე ვალდებული ვხდები, რომ ჩემთვის ვიყიდო კერძო სადაზღვეო პაკეტი, მაგრამ მე თუ მყავს 0-6 წლამდე ასაკის ბავშვი, მას შეუნარჩუნდება საყოველთაო ჯანდაცვით სარგებლობის უფლება. მე თუ მყავს პენსიონერი მშობელი, მას ასევე შეუნარჩუნდება“, - განაცხადა სერგეენკომ.

ჯანდაცვის მინისტრის ინფორმაციით, ქვეყანაში 32 00 ადამიანის წლიური შემოსავალი 40 000 ლარზე მეტია. მიუხედავად ამისა, რომ ისინი საყოველთაო ჯანდაცვის პროგრამის ბენეფიციარები არ იქნებიან, ისინი ისარგებლებენ სხვა სახელმწიფო პროგრამებით, მაგალითად, C ჰეპატიტის პროგრამითა და მშობიარობის დაფინანსებით.

რაც შეეხება სხვა მიზნობრივ ჯგუფებს, 0-5 წლამდე ბავშვებს, სტუდენტებს, პენსიონერებს, შშმ პირებს, პედაგოგებს, სოციალურად დაუცველებს ისევ ექნებათ უფლება, ისარგებლონ საყოველთაო ჯანდაცვის პროგრამის სრული სერვისით. ასევე მათ ენიჭებათ პრივილეგია, გამოიყეენონ კერძო დაზღვევის ( შემავსებელი) პაკეტი.

ანა მებურიშვილი