საზოგადოება

წელს 10 614-მა აბიტურიენტმა სახელმწიფო დაფინანსება მიიღო - მაია მიმინოშვილი

წელს ერთიანი ეროვნული გამოცდების შედეგების მიხედვით, 27 906 აბიტურიენტი სტუდენტი გახდა, რაც გამოცდებში მონაწილეთა 70%-ს შეადგენს. ამის შესახებ შეფასებისა და გამოცდების ეროვნული ცენტრის ხელმძღვანელმა მაია მიმინოშვილმა დღევანდელ ბრიფინგზე განაცხადა.

მისივე ინფორმაციით, 10 614-მა აბიტურიენტმა სახელმწიფო დაფინანსება მიიღო. მიმინოშვილის განმარტებით, ამ კატეგორიაში არიან როგორც სახელმწიფო გრანტის მფლობელები, ისე აბიტურიენტები, რომლებიც სახელმწიფოს მიერ დაფინანსებულ ფაკულტეტებზე ჩაირიცხნენ.

სახელმწიფო გრანტი დაახლოებით 6 500-მა აბიტურიენტმა მოიპოვა. აქედან 1 000-ზე მეტმა 100%-იანი დაფინანსება მიიღო, დაახლოებით 1 500-მა - 70%-იანი, 4 000-მა კი 50%-იანი გრანტის მოპოვება მოახერხა.

მიმინოშვილის ცნობით, ქართული ენის მომზადების პროგრამაზე 1 211 აბიტურიენტი ჩაირიცხა, მათ შორის ერთი ოსურენოვანი სტუდენტი. მან აღნიშნა, რომ წელს პროგრამაზე ჩარიცხულთა რაოდენობა გაიზარდა.

მიმინოშვილმა განაცხადა, რომ უნივერსიტეტებში 14 969 თავისუფალი ადგილი დარჩა, სადაც არცერთი სტუდენტი არ ჩარიცხულა.

პირველადი შედეგების გამოქვეყნების შემდეგ მიღებული ქულის ან კონკრეტული დავალების შეფასების გასაჩივრების შესაძლებლობით აპლიკანტთან 2%-მა ისარგებლა.