საზოგადოება

„ცენტრ პოინტი“ გაიყიდა - გუკა რჩეულიშვილი

„ცენტრ პოინტის“ სამეთვალყურეო საბჭოს თავმჯდომარის, გუკა რჩეულიშვილის განცხადებით, კომპანია გაიყიდა, თუმცა კონფიდენციალობის დაცვის საბაბით მან ახალი მფლობელის ვინაობა არ გაასაჯაროვა.

მისი თქმით, კომპანიის გადაცემა იმ პირობით მოხდა, რომ ყველა დაზარალებულის ინტერესი იქნება დაკმაყოფილებული.

„მოლაპარაკებები დასრულებულია. ახლა ვიწყებთ გადაბარების ტექნიკურ სამუშაოს. ჩვენ გავყიდეთ კომპანია, უბრალოდ მყიდველის კონფიდენციალურობას დავიცავ და ძალიან მოკლე პერიოდში მყიდველზე ინფორმაციას გაიგებს საზოგადოება. ჩვენი კომპანიის გაყიდვის მთავარი პირობა იყო დაზარალებულების დაკმაყოფილება და აქედან გამომდინარე მაიასა და რუსიკოსთვის საპროცესო შეთანხმების გაფორმება. როგორ მოხდება ეს ყველაფერი ტექნიკურად და როგორ დალაგდება, ვნახავთ. ასეთი დიდი გარიგება, მე მგონია, საქართველოში ამ სფეროში არ მომხდარა. სამუშაო მოცულობითია და რამდენ ხანში მოხდება ეს ყველაფერი, ვერ გეტყვით“, - განაცხადა რჩეულიშვილმა.

რჩეულიშვილის ინფორმაციით, ახალი მფლობელის გარდა „ცენტრ პოინტს“ ჰყავს კიდევ ერთი ინვესტორი. კომპანია X2 „ცენტრ პოინტის“ 2 ობიექტზე, ყიფშიძისა და კრწანისის მშენებლობაზე მუშაობს.

შეგახსენებთ, „ცენტრ პოინტის“ შეძენით დაინტერესებულ კომპანიებს შორის სახელოდებოდა m2, ასევე საუბარი იყო უკრაინულ სამშენებლო კომპანიაზე.

ანა მებურიშვილი