პოლიტიკა

თუ ჩვენს ქვეყანაში ვინმეს აქვს დიპლომატიური გამოცდილება და ცოდნა, ეს არის სალომე ზურაბიშვილი - დავით ჭიჭინაძე

საპარლამენტო უმრავლესობის წევრის, დავით ჭიჭინაძის განცხადებით, სალომე ზურაბიშვილის მიმართ სიმპათია არსებობს, დიპლომატიურ ურთიერთობებში მისი დიდი გამოცდილების გამო.

ჭიჭინაძემ აღნიშნა, რომ გასათვალისწინებელია ის გარემოებაც, რომ საქართველოში საპრეზიდენტო ინსტიტუტს სწორედ საგარეო ურთიერთობები ეხება.

„სალომე ზურაბიშვილის მიმართ სიმპათია არსებობს, რადგან მას აქვს დიპლომატიური ურთიერთობების საკმაოდ დიდი გამოცდილება. საპრეზიდენტო ინსტიტუტი დღეს არის საერთაშორისო ინსტიტუტი, რომელსაც გარე ურთიერთობები ეხება. თუ ჩვენს ქვეყანაში ვინმეს აქვს დიპლომატიური გამოცდილება და ცოდნა, ეს არის სალომე ზურაბიშვილი, რაც მან 2005 წელს დაამტკიცა კიდეც, როდესაც რუსეთის საგარეო საქმეთა მინისტრ სერგეი ლავროვთან ძალიან წარმატებული მოლაპარაკებები განახორციელა. მაშინ შევძელით რუსეთის ჯარების ვადაზე ადრე გაყვანა“, – განაცხადა დეპუტატმა.

მისი შეფასებით, აღნიშნულიდან გამომდინარე, სალომე ზურაბიშვილის გამოცდილება მისასალმებელია.

ცნობისთვის, ზურაბიშვილმა გუშინ განაცხადა, რომ საკუთარ კანდიდატურას დააყენებს საპრეზიდენტო არჩევნებში.