უახლესი ამბები
არქივი
კომენტარი
თუკი რამდენიმე ადამიანს მიეცა გარკვეული ქონების შეძენის საშუალება, მათ ასევე უნდა მიეცეთ შესაძლებლობა, განმარტონ ამ ქონების წარმომავლობა - დავით სერგეენკო
ჯანდაცვის მინისტრმა დავით სერგეენკომ მედიაში მაღალჩინოსანთა ძვირადღირებული სასახლეების შესახებ გავრცელებული ინფორმაციის კომენტირებისას განაცხადა, რომ „ქართული ოცნების“ წევრებს უნდა მიეცეს განმარტების გაკეთების საშუალება.
„სიტყვა კორუფციას ძალიან მყარი მტკიცებულება სჭირდება, მით უმეტეს, როცა არის მიბმული სიტყვა ელიტურ კორუფციასთან. თუკი რამდენიმე ადამიანს მიეცა იმის შესაძლებლობა, რომ გარკვეული ქონება შეეძინათ, მათ ასევე უნდა მიეცეთ იმის შესაძლებლობა, რომ განმარტონ, საჭიროების შემთხვევაში მშვიდ და საქმიან ვითარებაში, ამ ქონების წარმომავლობა“, - განაცხადა სერგეენკომ.
შეგახსენებთ, ფეშენებელური სასახლეები, რომლებიც „ქართული ოცნების“ მაღალჩინოსნებს ან ოჯახის წევრებს ეკუთვნით და რომლებიც 2012 წლის შემდეგ არის აშენებული „კურიერის“ კამერამ დააფიქსირა.
სასახლეების ნაწილი თავად „ქართული ოცნების“ ლიდერებზეა გაფორმებული, ნაწილი მათი ოჯახის წევრებზე, ნაწილი ნომინალურ მფლობელებზე, რომლებსაც სხვა არანაირი ქონება არ გააჩნიათ, თუმცა ძვირადღირებულ სახლებს მაინც ხელისუფლებს წარმომადგენლებს უთმობენ საცხოვრებლად. თანამდებობის პირების ქონება კი დრამატულ ზრდას 2012 წლის შემდეგ იწყებს, ანუ მას შემდეგ რაც ამ ადამიანებმა სახელისუფლებო სავარძლებში გადაინაცვლეს.