პოლიტიკა
თურქეთი პატივს ვცემთ საქართველოს მთავრობის გადაწყვეტილებას იერუსალიმზე - თურქეთის ელჩი საქართველოში
საქართველოში თურქეთის ელჩის, ფატმა ჯერენ იაზგანის განცხადებით, თურქეთმა იერუსალიმთან დაკავშირებულ გაეროს რეზოლუციის კენჭისყრაზე სწორი პოზიცია დაიკავა.
იაზგანმა აღნიშნა, რომ თურქეთი საქართველოს გადაწყვეტილებას პატივს სცემს.
ქართული დელეგაცია გენერალური ასამბლეის სხდომაზე არ გამოცხადდა.
„რაც შეეხება გაერო-ს გენერალურ ასამბლეაზე გუშინდელ კენჭისყრას, ქართულმა მხარემ განმარტა თავისი პოზიცია. თურქეთის პრეზიდენტმა, თურქეთის საგარეო საქმეთა მინისტრმა უკვე აღნიშნეს ამ გადაწყვეტილების მნიშვნელობა. როგორც თურქეთის მთავრობა, ჩვენ ამაყი ვართ, რომ სინდისის სწორ მხარეს ვართ. რა თქმა უნდა, ჩვენ პატივს ვცემთ საქართველოს მთავრობის გადაწყვეტილებას“, - განაცხადა ელჩმა.
გუშინ გენერალურმა ასამბლეამ 128 ხმით დაუჭირა მხარი რეზოლუციას, რომლითაც მოითხოვს აშშ-სგან, უკან წაიღოს თავისი გადაწყვეტილება, რომ იერუსალიმი ისრაელის დედაქალაქია. წინააღმდეგ გამოვიდა 9 ქვეყანა: გვატემალა, ისრაელი, მარშალის კუნძულები, პალაუ, ტოგო, მიკრონეზია, ნაურუ, ჰონდურასი და აშშ. 35-მა ქვეყანამ თავი შეიკავა კენჭისყრისას.
აშშ-ის პრეზიდენტმა დონალდ ტრამპმა იერუსალიმი ისრაელის დედაქალაქად 6 დეკემბერს აღიარა. მისი გადაწყვეტილებით, აშშ-ის საელჩო თელ-ავივიდან „წმინდა ქალაქში“ უნდა გადავიდეს.
ანა მებურიშვილი