მსოფლიო

უკრაინაში საკანონმდებლო დონეზე რუსეთი აგრესორ ქვეყნად იქნება აღიარებული

უკრაინის უმაღლეს რადაში პრეზიდენტ პეტრო პოროშენკოს წარმომადგენლის, ირინა ლუცენკოს ინფორმაციით, მზადაა კანონი დონბასის დაბრუნებისა და აღდგენის შესახებ.

„დავასრულეთ დონბასის რეინტეგრაციის კანონი ანუ, ესაა კანონი უკრაინის სახელმწიფო პოლიტიკის, მისი სახელმწიფო პოლიტიკური მიმართულების შესახებ დონბასის დაბრუნებისა და აღდგენის საკითხში“, - განუმარტა ლუცენკომ „5 канал“-ს.

ლუცენკოს თქმით, კანონში იქნება პირველად შეყვანილი განმარტება „რუსეთი აგრესორია“, ასევე ის, რომ უკრაინას აქვს თავდაცვის უფლება და ის არაა პასუხიმგებელი ოკუპირებულ ტერიტორიებზე არსებულ სიტუაციაზე.

რადაში უკრაინის პრეზიდენტის წარმომადგენლის თქმით, დოკუმენტი შეთანხმებულია ნორმანდიული ფორმატის წევრებთან.

„კონსულტაციებიც გაიმართა ჩვენს პარტნიორებთან ნორმანდიული ფორმატიდან. კონსულტაციებში ჩართული იყვნენ აშშ, ექსპერტები და სპეციალისტები. შემიძლია ვთქვა, რომ ის 99.9%-ითაა მზად პარლამენტში შესატანად და სარეგისტრაციოდ“, - თქვა ლუცენკომ.

შეგახსენებთ, 2015 წელს უმაღლესმა რადამ მიიღო განცხადება, რომლის მიხედვით რუსეთი აგრესორ ქვეყნადაა მიჩნეული. მანამდე 2014 წელს რუსეთმა ყირიმის ნახევარკუნძული დაიპყრო. უკრაინის კუთვნილი ტერიტორია დე-ფაქტოდ შეიყვანეს რუსეთის შემადგენლობაში.

ანა მებურიშვილი