პოლიტიკა

უმადურობა იქნება, რომ ვთქვა, სახელმწიფომ არაფერი გააკეთა, თუმცა არანაირი შედეგი არ დამდგარა - გიგა ოთხოზორიას დედა

ე.წ მესაზღვრის მიერ საქართველოს მოქალაქის გიგა ოთხოზორიას მკვლელობიდან 2 წელი გავიდა. მოკლულის დედის, ჯულიეტა ჭანტურიას თქმით, სახელმწიფოს ნაბიჯების მიუხედავად, არანაირი შედეგი არ დამდგარა და ბრალდებული რაშიდ კანჯი-ოღლი არ დასჯილა.

„ველოდებოდი, რომ ყველაფერი გაკეთდებოდა, რათა დამნაშავისა და მისი დამქაშებისთვის ეჩვენებინათ, რომ უდანაშაულო ადამიანის მკვლელობა არავის შერჩებოდა. უმადურობა იქნება, რომ ვთქვა, სახელმწიფომ არაფერი გააკეთა, თუმცა არანაირი შედეგი არ დამდგარა“, - თქვა ჭანტურიამ.

ოთხოზორიას დედის თქმით, კანჯი-ოღლიზე არანაკლებ დამნაშავეა სამი პირი, ვინც ბრალდებულს თან ახლდა. ჯულიეტა ჭანტურიას თქმით, მათ მიმართ საქართველოს საგამოძიებო უწყებას არანაირი კითხვა არ ჰქონია.

გიგა ოთხოზორიას საფლავზე მისი ახლობლები, ნათესავები, ოჯახის წევრები შეიკრიბნენ, ასევე მივიდნენ ადგილობრივი ხელისუფლების წარმომადგენლები.

გიგა ოითხოზორია ცეცხლსასროლი იარაღიდან გასროლით მოკლეს. ზუგდიდის რაიონულმა სასამართლომ მკვლელობაში ბრალდებული რაშიდ კანჯი-ოღლი დამნაშავედ ცნო და მას 12 წლით თავისუფლების აღკვეთა დაუსწრებლად მიესაჯა. ქუთაისის სააპელაციო სასამართლოს გადაწყვეტილებით კი, მას სასჯელის ზომად 14 წლით თავისუფლების აღკვეთა განესაზღვრა. აფხაზეთის დე-ფაქტო მთავრობამ კი რაშიდ კანჯი-ოღლის მიმართ სისხლის სამართლებრივი დევნა შეწყვიტა