საზოგადოება

უცხო ენების გამოცდებზე პირველადი მონაცემებით, 6,2% კი ჩაიჭრა

გამოცდების ეროვნულმა ცენტრმა უცხო ენების გამოცდების შედეგები გამოაქვეყნა.

პირველადი მონაცემებით, გამოცდის მაქსიმალური 90 ქულა რეკორდულად მაღალმა 109 აბიტურიენტმა აიღო, ხოლო 6,2% კი ჩაიჭრა.

გამოცდების ეროვნული ცენტრის უცხოური ენის ჯგუფის ხელმძღვანელის რუსუდან ტყემალაძის შეფასებით, როგორც ჩაჭრილების, ასევე უმაღლესი ქულების ამღებთა ორივე შედეგი წინა წელთან შედარებით მაღალია

„უმაღლესი 90 ქულა აიღო 109 აბიტურიენტმა, რაც არის ძალიან კარგი მაჩვენებელი. ეს იმას ნიშნავს, რომ თემის წერის ნაწილში, რომელიც ტრადიციულად უჭირთ აბიტურიენტებს, მაქსიმალური 16 ქულა აიღეს და სხვა საკითხებიც შეცდომის გარეშე დაძლიეს. შარშანდელთან შედარებით წელს უფრო მეტია 90 ქულის მქონე აბიტურიენტთა რაოდენობა, თუმცა ამავე დროს ასევე შარშანდელთან შედარებით ოდნავ უფრო მეტია ჩაჭრილთა რაოდენობაც”, – განაცხადა რუსუდან ტყემალაძემ.

მისივე თქმით, მოსალოდნელია, რომ სკალირების შემდეგ ჩაჭრილთა პროცენტული მაჩვენებელი დაიკლებს.

„ეს იმ შემთხვევაში მოხდება თუ ინგლისურის ოთხივე ვარიანტში, რომელიმე ოდნავ რთული აღმოჩნდა. მოხდება ვარიანტების სკალირება და დადგინდება თითოეული ვარიანტის სირთულის დონე. სკალირების პროცესი საკმაოდ ფაქიზი ანალიზია, რომელიც ადასტურებს, რომელი ვარიანტი იყო, ან ოდნავ რთული ან ოდნავ მარტივი და ამის მიხედვით შეიძლება გამსვლელი ქულა რამდენიმე აბიტურიენტს ერთით მოემატოს. ამის შედეგად 6,2 პროცენტი ოდნავ ალბათ დაიკლებს, მაგრამ არ უნდა გვქონდეს მოლოდინი, რომ ის შეიძლება გახდეს 5%,“- განაცხადა ტყემალაძემ.