საზოგადოება

ვერ ავიღებ პასუხისმგებლობას, რომ 109-ე ბაღში გაგრძელდეს სწავლა - კახა კალაძე

თბილისის მერმა კახა კალაძემ უარყო ინფორმაცია, რომ ისნის რაიონში მდებარე 109-ე ბაგა-ბაღი უნდა გასხვისდეს და ამის გამო დაიკეტა.

კალაძის ინფორმაციით, სამხარაულის ექსპერტიზის ეროვნულმა ბიურომ დაადგინა შენობის ავარიულობა, რის გამოც ბაღში სასწავლო პროცესი შეწყდა წლის ბოლომდე.

„მე ვიღებ პასუხისმგებლობას, როგორც დედაქალაქის მერი, რომ ასეთი ქმედებები [ბაღის გასხვისება] ჩვენი ხელისუფლების დროს დაუშვებელია. თუ რაიმეს გასხვისება გვინდა, ამას ღიად ვიტყვით, არაფერი გვაქვს მოსახლეობასთან დასამალი. ჩვენ დავიწყეთ კონკრეტული ბაღების შემოწმება. ექსპერტიზის ბიუროს დასკვნის საფუძველზე, ეს კონკრეტული ბაღი ავარიული და საშიშია. შესაბამისად, მე როგორც დედაქალაქის მერი, ნამდვილად ვერ ავიღებ პასუხისმგებლობას, რომ ამ ბაღში გაგრძელდეს სწავლა. მე მგონი, ეს მშობლებმაც კარგად უნდა გაიაზრონ. რომელ ბაღშიც სწავლა დროებით შეჩერებულია, წლის ბოლოსთვის ყველანაირი სამუშაოები იქნება დასრულებული“, – თქვა მერმა.

109-ე ბაგა-ბაღის აღსაზრდელების მშობლები ბაღის დახურვას აპროტესტებენ. მათ არ სჯერათ, რომ ბაღის დახურვის მიზეზი შენობის ავარიულობაა და აცხადებენ, რომ აღნიშნულ ტერიტორიაზე სასტუმროს მშენებლობა იგეგმება.

ექსპერტიზის ბიუროს დასკვნით, შენობის ძირითადი ნაწილის ტექნიკური მდგომარეობა არადამაკმაყოფილებელია და საექსპლუატაციო ვარგიასიანობის თვალსაზრისით მეორე კატეგორიას მიეკუთვნება, რაც გულისხმობს შენობის გამაგრების საჭიროებას. ამის გათვალისწინებით, შენობა დღეს იკეტება.

სულ აღნიშნულ ბაღში 731 აღსაზრდელია რეგისტრირებული, ისინი კვირის ბოლომდე ახლომდებარე სამ ბაღში განაწილდებიან. N128, N16, და N215 ბაღებში მოეწყობა სივრცეები, სადაც დახურული ბაღიდან გადაყვანილი ჯგუფები განთავსდება. გადანაწილებული ჯგუფები სააღმზრდელო პროცესს 23 აპრილიდან გააგრძელებენ.