კომენტარი
ვინც არ უნდა დაიკავოს პრეზიდენტის პოზიცია, მისი უმთავრესი ფუნქცია რუსეთის მხილება იქნება - ანა ნაცვლიშვილი
გადახედვას არ ექვემდებარება ის ფაქტი, რომ რუსეთ-საქართველოს ომი რუსეთმა დაიწყო, - განაცხადა პრეზიდენტის საპარლამენტო მდივანმა ანა ნაცვლიშვილმა 2008 წლის ომთან დაკავშირებით პრეზიდენტობის დამოუკიდებელი კანდიდატის, სალომე ზურაბიშვილის განცხადებებზე დასმული კითხვის პასუხად.
ნაცვლიშვილმა მომავალი პრეზიდენტის ერთ-ერთ ფუნქციად საერთაშორისო ასპარეზზე რუსეთის მხილება დაასახელა.
„საქართველო არის ოკუპურებული ქვეყანა და გადახედვას არ ექვემდებარება ის ფაქტი, რომელიც აღიარებულია - რუსეთ-საქართველოს ომი რუსეთმა დაიწყო. ისევე, როგორც საუკუნეების განმავლობაში, ისტორიულად რუსეთი ებრძოდა საქართველოს სახელმწიფოებრიობასა და ტერიტორიულ მთლიანობას.
აქედან გამომდინარე, საქართველოს პრეზიდენტის ყველაზე მნიშვნელოვანი თუ არა, ერთ-ერთი უმთავრესი ფუნქციაა საქართველოს ადვოკატირება განსაკუთრებით საერთაშორისო ასპარეზზე, რათა მსოფლიოს დღის წესრიგში მუდმივად იდგეს ოკუპაციისა და რუსეთის, როგორც ოკუპანტის თემა.
ვინც არ უნდა დაიკავოს ეს პოზიცია, მისი უმთავრესი ფუნქცია იქნება სწორედ ქვეყნის საერთაშორისო ასპარეზზე წარმოჩენა, როგორც ოკუპირებული ქვეყნის და რუსეთის მხილება ყველა საშუალებით იმ დანაშაულებში, რომელიც ჩაიდინა და დღემდე ჩადის საქართველოსთან მიმართებაში", - განაცხადა ნაცვლიშვილმა.
ცნობისთვის, სალომე ზურაბიშვილმა აგვისტოს ომთან დაკავშირებით დასმულ კითხვაზე განაცხადა, რომ „ჩვენ დავბომბეთ ჩვენი მოსახლეობა, რისი უფლებაც არც ერთ პრეზიდენტს არ გააჩნია“.