პოლიტიკა

ვინც სალომე ზურაბიშვილს დაუჭერს მხარს, ის არის საქართველოზე ტყვიის მსროლელი, ვინც მას დააფინანსებს - ქვეყნის მტერი - შალვა ნათელაშვილი

„ლეიბორისტული პარტიის“ ლიდერმა შალვა ნათელაშვილმა გააკრიტიკა „ქართული ოცნება“ იმის გამო, რომ მმართველი გუნდი საპრეზიდენტო არჩევნებზე სალომე ზურაბიშვილს დაუჭერს მხარს.

ნათელაშვილის მტკიცებით, ზურაბიშვილი კრემლის აგენტია.

„ვაი-ხელისუფლებამ კიდევ ერთხელ გაგვახარა და როგორც მოსალოდნელი იყო, გახსნა უკანასკნელი სამაშველო რგოლი კრემლის კანდიდატურის, სალომე ზურაბიშვილის სახით - პრინციპით, ჩემი არ არის, მაგრამ სრულიად ჩემია.

მმართველი პარტია მხარს უჭერს პერსონას, რომლის წიგნი მოსკოვმა წარადგინა მტკიცებულებად საერთაშორისო სასამართლოებში, რომ აფხაზეთი და ცხინვალის რეგიონი კანონიერად ჩამოსცილდა საქართველოს და ისინი დამოუკიდებელი სახელმწიფოებია.

შესაბამისად, დღეს უკვე წყდება არა პრეზიდენტის არჩევის საკითხი, არამედ ეს არის რეფერენდუმი, ქვეყნის სახელმწიფოს, ხალხის, ერთიანობაზე, აფხაზეთის დაბრუნებაზე, ცხინვალის დაბრუნებაზე.

ვინც ამ სუბიექტს მისცემს ხმას, ის არის საქართველოზე ტყვიის მსროლელი, ვინც მას დააფინანსებს, ის არის ქვეყნის მტერი, ხოლო აქტივისტი, მისი მხარდამჭერი არის საქართველოს შადიმანი“,- განაცხადა ნათელაშვილმა.