საზოგადოება

ზაზა სარალიძეს პატრიარქის ნახვა სურს

ხორავას ქუჩაზე მოკლული დავით სარალიძის მამამ, ზაზა სარალიძემ სრულიად საქართველოს კათოლიკოს პატრიარქ ილია მეორესთან შეხვედრის სურვილი გამოთქვა.

„ძალიან დიდი სურვილი მაქვს, თუ საშუალება იქნება, 16:00 საათზე შევხვდე ჩემს სულიერ მამას. მე მას მარტო შევხვდები და, რა თქმა უნდა, ჩემს შვილსა და ოჯახზე ვისაუბრებთ. აქცია მანამ დარჩება ძალაში, სანამ ჩემი შვილის მკვლელები, მკვლელებზე ხელის დამფარებლები, საქმის გამყალბებლები და ამ სისტემის მფარველები არ დაისჯებიან. ძალაში რჩება პრემიერისა და მინისტრთა კაბინეტის გადადგომის მოთხოვნა, რადგან სისტემას ეგენი მფარველობენ. ეს პრობლემა უკვე მოგვარებული უნდა იყოს. მე მივდივარ ჩემს სულიერ მამასთან არა იმაზე, რომ შეთანხმებებზე წავიდეთ, არამედ გავუზიარო ჩემი გაჭირვება“, -უთხრა სარალიძემ ჟურნალისტებს.

გუშინ თბილისის პარლამენტთან ზაზა სალარიძის სოლიდარობის აქცია #ნუმომკლავ ჩატარდა, სადაც ათასობით ადამიანი შეიკრიბა. მათ შეუერთდა ხორავას ქუჩაზე კიდევ ერთი მოკლული მოზარდის, ლევან დადუნაშვილის მამა, დათო დადუნაშვილი.

აქცია დღეს 18 საათზე განახლდება.