კომენტარი

გიორგი აბაშიშვილის განცხადება რაღაც ისტერიკულია - გია ვოლსკი

პარლამენტის ვიცე-სპიკერმა - გია ვოლსკიმ პრეზიდენტის ადმინისტრაციის უფროსის, გიორგი აბაშიშვილის განცხადება, რომლის მიხედვით „ევროპული საქართველო“ და „ქართული ოცნება“ გაერთიანდნენ გიორგი მარგველაშვილის წინააღმდეგ, „ისტერიკული“ უწოდა.

„პრეზიდენტის ადმინისტრაციის უფროს გიორგი აბაშიშვილს არაფერს ვუპასუხებდი, რადგან მისი განცხადება რაღაც ისტერიკულია, არც ხუმრობას და არც სერიოზული კაცის ნათქვამს არ ჰგავს“, -უთხრა დეპუტატმა ჟურნალისტებს.

მისი შეფასებით, გიორგი აბაშიშვილის განცხადება შექმნილი ვითარების ადეკვატური არ არის.

შეგახსენებთ, პრეზიდენტის ადმინისტრაციის უფროსმა გიორგი აბაშიშვილმა განაცხადა, რომ „საქართველოს პარლამენტში ,,ევროპული საქართველოსა“ და ,,ქართული ოცნების“ მონაწილეობით, ახალი საკონსტიტუციო უმრავლესობის ფორმირების პროცესი მიმდინარეობს და ძალიან სამწუხაროა, რომ ამ უმრავლესობის მთავარი გამაერთიანებელი დღეს საქართველოს პრეზიდენტის წინააღმდეგ ბინძური კამპანიის წარმოებაა“. ასე გამოეხმაურა აბაშიშვილი ოპოზიციისა და უმრავლესობის კრიტიკას, რომელიც ეხებოდა პრეზიდენტის მიერ შეწყალებულ ვეფხია ბაქრაძეს.

ბაქრაძე სასჯელს იხდიდა ოჯახური ძალადობისთვის, 2017 წელს ის პრეზიდენტმა შეიწყალა. მიმდინარე წლის 13 აპრილს ბაქრაძემ ყოფილ მეუღლეზე შურისძიების მიზნით თავის გერს, თამარ გამრეკელაშვილს ყელი გამოსჭრა ახალგაზრდა ქალის ორი მცირეწლოვანი შვილის თვალწინ.