მსოფლიო

სომხეთში „სამოქალაქო დაუმორჩილებლობის“ აქციები განახლდა

სომხეთში „სამოქალაქო დაუმორჩილებლობის“ სახელით ცნობილი საპროტესტო მოძრაობა, რომელსაც ხელმძღვანელობს პარტია „სამოქალაქო თანხმობის“ ლიდერი ნიკოლ პაშინიანი, განახლდა.

პაშინიანმა მოუწოდა მხარდამჭერებს, შეიკრიბონ ერევნის რესპუბლიკის მოედანზე იმისთვის, რომ „განამტკიცონ ხავერდოვანი ეროვნული რევოლუციის გამარჯვება“.

დემონსტრანტებს შეუერთდა გაგიკ ცაცუკიანის პარტია „აყვავებული სომხეთი“. პარტიამ თავის მომხრეებს ქუჩებში გასვლისკენ მოუწოდა.

გუშინ გვიან საღამოს ნიკოლ პაშინიანმა ფეისბუკის ვიდეომიმართვაში განაცხადა, რომ მთავრობა ცდილობს, გამოიყენოს პრემიერის პოსტიდან სერჟ სარგსიანის გადადგომა რესპუბლიკური პარტიის მმართველობის შესანარჩუნებლად. შემდგომ ცნობილი გახდა, რომ დღეისთვის დაგეგმილი შეხვედრა პაშინიანსა და პრემიერის დროებითი მოვალეობის შემსრულებლის, კარენ კარაპეტიანს შორის აღარ გაიმართება.

თავის მხრივ, კარენ კარაპეტიანმა გაავრცელა განცხადება, რომლის თანახმად, პაშინიანმა ცალმხრივად წააყენა მოთხოვნები, რომლებიც დიალოგს გამორიცხავდა.

აქციები სომხეთში 13 აპრილს დაიწყო, რასაც მოჰყვა ორშაბათს სერჟ სარგსიანის გადადგომა პრემიერის თანამდებობიდან.