პოლიტიკა

ივანიშვილი იძულებულია, გამოვიდეს ხეების ჩრდილის კომფორტიდან და პირადი დაცვა ისევ ღია პოლიტიკაში ეძებოს - მიხეილ სააკაშვილი

საქართველოს ექს-პრეზიდენტი, მიხეილ სააკაშვილი ქვეყნის ყოფილი პრემიერის, ბიძინა ივანიშვილის პოლიტიკაში დაბრუნებას გამოეხმაურა. სააკაშვილის შეფასებით, ივანიშვილი შეშინებულია სომხეთში მიმდინარე საპროტესტო აქციებით, რომლის შედეგად თანამდებობა დატოვა სერჟ სარგსიანმა.

„ივანიშვილი ბორგავს, მის წინააღმდეგ საფრანგეთში სისხლის სამართლის საქმის აღძვრითა და მეზობელ სომხეთში ოლიგარქიის დამხობით შეშინებული, იძულებული ხდება გამოვიდეს ხეების ჩრდილის კომფორტიდან და პირადი დაცვა ისევ ღია პოლიტიკაში ეძებოს. იმას კი ვერ ხვდება, რომ ის ვეღარ იქნება პოლიტიკის განმკარგავი.

საქართველოში ხელისუფლებას წელსვე დაიბრუნებს ქართველი ხალხი, რომელსაც ივანიშვილი უმოწყალოდ ძარცვავს თავისი ბანკების მეშვეობით. ჩვენ წელს დავასრულებთ ერთდროულად ივანიშვილის მმართველობას და ხალხის გაჭირვებას“, - დაწერა სააკაშვილმა ფეისბუკზე.

დღევანდელ ბრიფინგზე ქვეყნის პრემიერმა გიორგი კვირიკაშვილმა განაცხადა, რომ ბიძინა ივანიშვილი პარტია „ქართული ოცნება-დემოკრატიულ საქართველოს“ თავმჯდომარეობას დათანხმდა.