პოლიტიკა

საკონსტიტუციო სასამართლომ ამ გადაწყვეტილებით საკანონმდებლო ბერკეტებს გვართმევს, რომ ვარეგულიროთ მარიხუანის მოხმარება ქვეყნაში - აკაკი ზოიძე

ჯანმრთელობის დაცვისა და სოციალურ საკითხთა საპარლამენტო კომიტეტის თავმჯდომარის, აკაკი ზოიძის განცხადებით, საკონსტიტუციო სასამართლომ მარიხუანის მოხმარებასთან დაკავშირებული გადაწყვეტილებით პარლამენტს საკანონმდებლო ბერკეტები გამოაცალა.

„მიუხედავად იმისა, ვინ რას ბრძანებს, რეალურად, ფორმალურად, მარიხუანა რჩება აკრძალული, საუბარია იმაზე, რომ ჩვენ გუშინდელმა გადაწყვეტილებამ გამოგვაცალა ბერკეტი კანონის აღსრულებისთვის.

სასამართლოს სჯობდა, ემსჯელა სხვა ნარკოტიკების დეკრიმინალიზაციაზე მარიხუანას გარდა და არა მარიხუანას ასეთ გადაწყვეტილებაზე, რომელიც საკანონმდებლო ბერკეტებს გვართმევს, რომ ვარეგულიროთ ამ ნარკოტიკის მოხმარება ქვეყნაში.ის, რომ მარიხუანა ნარკოტიკია, ყველას ავიწყდება“, -თქვა ზოიძემ.

მისივე თქმით, უმჯობესია, პარლამენტმა ამ გადაწყვეტილებას შეზღუდვებით უპასუხოს, კერძოდ, მარიხუანას მოხმარება აუკრძალოს 21 წლამდე ასაკის ადამიანს.

„მაქსიმალური შეზღუდვები და აკრძალვები გამოვიყენოთ მარიხუანასთან მიმართებაში. მომხრე ვიქნები,რომ ეს გავრცელდეს 21 წლამდე, როგორც ეს ცივილურ ქვეყნებშია“, -თქვა ზოიძემ.

ცნობისთვის, გუშინ საქართველოს საკონსტიტუციო სასამართლოს პირველმა კოლეგიამ „გირჩის“ წევრების ზურაბ ჯაფარიძისა და ვახტანგ მეგრელიშვილის ერთობლივი სარჩელი დააკმაყოფილა, რომლითაც მარიხუანას მოხმარებაზე ადმინისტრაციული სასჯელი გააუქმა.