პოლიტიკა

საქართველოს საგარეო საქმეთა მინისტრი წმინდა საყდრის ნუნციოს შეხვდა

აგვისტოს საქართველოს საგარეო საქმეთა მინისტრმა დავით ზალკალიანმა წმინდა საყდრის ნუნციო საქართველოში, მონსინიორ ჟოზე აველინო ბეტანკური მიიღო.

შეხვედრაზე, რომელიც გაცნობით ხასიათს ატარებდა, მხარეებმა საქართველოსა და ვატიკანის ორმხრივი და მრავალმხრივი ურთიერთობების აქტუალური საკითხები განიხილეს. ნუნციოს განცხადებით, საქართველოსა და წმინდა საყდარს ისტორიული ურთიერთობები აკავშირებთ, რომელიც გულთბილობითა და პატივისცემით ხასიათდება.

წმინდა საყდრის დესპანმა ასევე წარმატებები უსურვა დავით ზალკალიანს საგარეო საქმეთა მინისტრის თანამდებობაზე, საქართველოს წინაშე არსებული საგარეო პოლიტიკური ამოცანების გადაწყვეტის საქმეში.

საქართველოსა და წმინდა საყდარს შორის ჩამოყალიბებული მჭიდრო, მეგობრული და ნაყოფიერი თანამშრომლობის კონტექსტში ხაზი გაესვა ბოლო წლებში ორმხრივი ვიზიტების მაღალ დინამიკას და მათი შემდგომი ურთიერთგაცვლის აუცილებლობას.

დავით ზალკალიანმა მონსინიორ ბეტანკურს გააცნო აფხაზეთისა და ცხინვალის ოკუპირებულ რეგიონებში უსაფრთხოებისა და ჰუმანიტარული კუთხით არსებული ვითარება და მადლობა გადაუხადა წმინდა საყდრის მიერ საქართველოს ტერიტორიული მთლიანობისა და სუვერენიტეტის, ასევე არაღიარების პოლიტიკის მტკიცე მხარდაჭერისათვის. ჟოზე აველინო ბეტანკურმა კიდევ ერთხელ დაადასტურა ვატიკანის ურყევი მხარდაჭერა ჩვენი ქვეყნის ტერიტორიული მთლიანობის მიმართ. ამასთან, მან ხაზი გაუსვა ადგილნაცვალ პირთა და ლტოლვილთა პრობლემის განსაკუთრებულ სიმწვავეს.

შეხვედრაზე საგარეო საქმეთა მინისტრმა აღნიშნა, რომ ევროპულ ოჯახში ინტეგრაცია საქართველოს საგარეო და საშინაო პოლიტიკის ქვაკუთხედია, რაც ქართველი ხალხის ეროვნულ იდეასა და შეუქცევად არჩევანზეა დაფუძნებული. მონსინიორ ბეტანკურმა, თავის მხრივ, მხარდაჭერა გამოხატა საქართველოს, როგორც ევროპული ცივილიზაციისა და კულტურის მქონე ქვეყნის ევროკავშირთან ინტეგრაციის კურსის მიმართ.

საუბრისას ხაზი გაესვა განათლების, მეცნიერებისა და კულტურის სფეროებში ორმხრივი თანამშრომლობის მნიშვნელობას. დავით ზალკალიანმა განსაკუთრებული მადლიერებით აღნიშნა ვატიკანის მხრიდან განხორციელებული კულტურული და საგანმანათლებლო პროექტები, ასევე კარიტასის მიერ გაწეული ფასდაუდებელი ჰუმანიტარული და სოციალური საქმიანობა.

შეხვედრისას მხარეებმა კიდევ ერთხელ დაადასტურეს შემდგომი ორმხრივი თანამშრომლობის მზადყოფნა.