კომენტარი

ცრუ განცხადებებთან და ცრუ ომთან დაკავშირებით ჩვენი რეაგირება ყოველთვის იქნება ძალიან მკაცრი - გიორგი მიქაუტაძემ

განცხადებებს ვისმენთ ბოლო დღეების განმავლობაში, თითქოს სასამართლოდან მოხდა რაღაც დაცული ინფორმაციის გაჟონვა, ეს არის სიცრუე, - განუცხადა ჟურნალისტებს იუსტიციის უმაღლესი საბჭოს მდივანმა გიორგი მიქაუტაძემ პირადი ცხოვრების ამსახველი ფარული ჩანაწერის სასამართლოდან შესაძლო გავრცელებაზე კომენტირებისას.

„ბოლო პერიოდის განმავლობაში არაერთი ცილისწამება და ცრუ ფაქტების შემცველი განცხადება გავიგეთ. ზუსტად ასეთ განცხადებებს ვისმენთ ბოლო დღეების განმავლობაშიც, თითქოს სასამართლოდან მოხდა რაღაც დაცული ინფორმაციის გაჟონვა, თუ მიზანმიმართული გავრცელება. კიდევ ერთხელ ვამბობ, რომ ეს არის სიცრუე და ამ განცხადების ავტორმა ყველაზე კარგად იცის, რომ ეს არის შეთხზული ტყუილი, მიზნად ემსახურება კონკრეტული პირების კონკრეტულ მიზნებს, რომელზეც ახლა არ დავიწყებ განხილვას. მინდა, ვთხოვო საგამოძიებო ორგანოებს, რომ თუ ამ დანაშაულის გახსნა სერიოზულ ძალისხმევას მოითხოვს, ძალიან მარტივია გადამოწმდეს ის, რომ პროკურატურისა და საგამოძიებო ორგანოების ლუქები, რომელიც ედო ამ საიდუმლო მასალებს, დღემდე ხელუხლებელია და პირველი და მეორე ინსტანციის სასამართლოებს ეს მტკიცებულებები, ელემენტარულად, არ გაუხსნია და არ გამოუკვლევია. ვერავინ მეტყვის, რომ ერთხელ მაინც მოხდა იმის პრეცედენტი, რომ სასამართლოდან მსგავსმა ინფორმაციამ გაჟონა. არანაირ ლოგიკას არ ექვემდებარება რომ ეს ახლა მოხდა. ასეთ ცრუ განცხადებებთან და ცრუ ომთან დაკავშირებით ჩვენი რეაგირება ყოველთვის იქნება ძალიან მკაცრი“, - განაცხადა გიორგი მიქაუტაძემ.