კომენტარი

სამართლებრივი და კვალიფიციური არგუმენტები თავიანთი პოზიციების დასადასტურებლად არ გააჩნიათ - დიმიტრი გვრიტიშვილი

საკანონმდებლო ცვლილების განხორციელების შემთხვევაში მოსამართლე დიმიტრი გვრიტიშვილი არ გამორიცხავს, რომ საკონსტიტუციო სასამართლოს მიმართოს.

მისთვის მიუღებელია, „საერთო სასამართლოების შესახებ“ საქართველოს ორგანულ კანონში ცვლილებების შეტანა, რომელიც საქალაქო და სააპელაციო სასამართლოში მოსამართლეების უვადოდ დანიშვნის პროცესის 5 წლით შეჩერებას გულისხმობს.

საკითხზე დღეს თბილისის საქალაქო სასამართლოში გამართულ იუსტიციის უმაღლესი საბჭოს სხდომაზე იმსჯელეს. მოსამართლეებმა ცვლილებათა პაკეტს უკან გადადგმული ნაბიჯი უწოდეს და ავტორებთან ერთად, იუსტიციის საბჭოს არამოსამართლე წევრებიც მკაცრად გააკრიტიკეს.

„სიტყვები არ მყოფნის, რომ ადეკვატურად და სრულად შევაფასო არამოსამართლე წევრების, ნაზი ჯანეზაშვილის და ანა დოლიძის დღევანდელი საქციელი. მეგონა, რომ ეს იქნებოდა დისკუსიის რეჟიმი, რომ მოხდებოდა მოსაზრებების გაცვლა, თუმცა, მივიღეთ სამარცხვინო ვითარება, როდესაც ვსაუბრობდით მხოლოდ მოსამართლეები, ხოლო ანა დოლიძე და ნაზიბროლა ჯანეზაშვილი ბოლომდე ინარჩუნებდნენ „ღირსეულ დუმილს“. სამართლებრივი და კვალიფიციური არგუმენტები თავიანთი პოზიციების დასადასტურებლად არ გააჩნიათ. მათ ელემენტარულად გამბედაობა არ ეყოთ, რომ მოსამართლეებისთვის შეკითხვებზე პასუხი გაეცათ,“ - განაცხადა დიმიტრი გვრიტიშვილმა.