პოლიტიკა

14 ოპოზიციური პარტიის საკანონმდებლო ინიციატვები აბსურდულია, როგორც ჩანს, ამ მხრივ მძიმე სიტუაცია გვაქვს- ირაკლი კობახიძე

საქართველოს პარლამენტის თავმჯდომარის ირაკლი კობახიძის განცხადებით, 14 ოპოზიციური გაერთიანების საკანონმდებლო წინადადებები „ადგილობრივი თვითმმართველობის შესახებ“ და „თბილისის შესახებ“ კანონებში ცვლილებების შეტანის შესახებ - აბსურდულია.

ამის შესახებ კობახიძემ პარლამენტის ბიუროს სხდომაზე 3-5 მაისის პლენარული სხდომების დღის წესრიგის განხილვის დროს განაცხადა.

„გარდა იმისა, რომ წარმოდგენილი კანონების ნაწილი აღარ არსებობს და სათაურშივე არის დაშვებული ხარვეზები, საკანონმდებლო წინადადებაც აბსურდულია და მისი განხილვის ვადის გაგრძელების მოთხოვნაც. ასევე არ არის გასაზიარებელი, რომ იურიდიული კომიტეტი ჩაერთოს განხილვაში. ეს მეტყველებს, რამდენადაა ესა თუ ის პარტია მომწიფებული, რომ კანონპროექტებთან დაკავშირებით იმსჯელოს. როგორც ჩანს, ამ მხრივ მძიმე სიტუაცია გვაქვს“, - განაცხადა ირაკლი კობახიძემ.

მონიკა დავლიანიძე