საზოგადოება

166-ე საჯარო სკოლის მოსწავლეები ოკუპირებულ ყირიმში „არტეკის“ ბანაკში მიემგზავრებიან

თბილისის 166-ე საჯარო სკოლის ექვსი მოსწავლე რუსული ენის გასაუმჯობესებლად ოკუპირებულ ყირიმში, „არტეკის“ საერთაშორისო საბავშვო ცენტრში გაემგზავრა.

ამის შესახებ Sputnik-Georgia წერს.

„დავიწყეთ ბანაკისთვის მზადება. სხვადასხვა ვიდეო გადავიღეთ, შემდეგ სლაიდი გავაკეთეთ თემაზე „რას ნიშნავს ჩვენთვის რუსეთი და რა როლს ასრულებს ის ჩვენს ცხოვრებაში“. მერე ტესტირება გავიარეთ, რომელიც პუშკინის ინსტიტუტის მიერ არის შედგენილი. თავიდან, სკოლაში ბევრი მსურველი იყო, თუმცა თანდათან მათი რაოდენობა შემცირდა, და დავრჩით მხოლოდ ექვსნი. ბანაკი ძალიან მოგვწონს. გამომდინარე იქიდან, რომ ქართულ სკოლაში ვსწავლობ, რუსულად საუბარი არ მიწევდა, და კომპლექსი მქონდა. ეხლა უკვე შევეჩვიე და შედარებით თავისუფლად ვსაუბრობ“,-თქვა „სპუტნიკთან“ საუბარში ლუკა ჯოლოხავამ.

მისი თქმით, რუსეთში 6 წლის განმავლობაში ცხოვრობდა, ამიტომაც დათანხმდა ბანაკში გამგზავრებაზე, რომ რუსული ენის ცოდნა აიმაღლოს.

სკოლის მოსწავლეებისათვის და პედაგოგებისთვის პირველი საერთაშორისო გაცვლა რუსულ ენაში „არტეკში“ 7 აგვისტოდან 27 აგვისტომდე ტარდება.

აღნიშნული ღონისძიების ორგანიზატორია რუსული ენის საბჭო, რომელიც რუსეთის მთავრობის ფარგლებში ფუნქციონირებს.

ღონისძიებაში 26 ქვეყნის წარმომადგენელი, 20 პედაგოგი და 170 სკოლის მოსწავლე მონაწილეობს.