საზოგადოება
2018 წლის ბიუჯეტის პროექტში 88 მილიონ ლარამდეა გაზრდილი ქალაქის ეკოლოგიური მდგომარეობის გაუმჯობესებისთვის
საზოგადოებრივი ტრანსპორტის განვითარების ნაწილში, დაგეგმილია მეტროსადგურების რეაბილიტაცია და ავტობუსების სამარშრუტო ქსელის დახვეწა-გაფართოება, - განუცხადა ჟურნალისტებს თბილისის საკრებულოს ფრაქცია „ქართული ოცნების“ თავმჯდომარემ ბექა დავითულიანმა დღევანდელ ბრიფინგზე.
მისი თქმით, თბილისის საცობებისგან განტვირთვის მიზნით, მომავალ წელს თბილისის სატრანსპორტო სისტემის განვითარების გეგმა შემუშავდება, რომელზე დაყრდნობითაც, ქალაქის ხელისუფლება სატრანსპორტო კოლაფსის თავიდან აცილებას და საზოგადოებრივი ტრანსპორტის განვითარებას შეძლებს.
„2018 წელს თბილისის სატრანსპორტო სისტემის განვითარების გეგმაზე მუშაობა დაიწყება, რომელზე დაყრდნობითაც თავიდან უნდა ავიცილოთ სატრანსპორტო კოლაფსი და შევძლოთ, საზოგადოებრივი ტრანსპორტის განვითარება, ქალაქის საცობებისგან განტვირთვა. საზოგადოებრივი ტრანსპორტის განვითარების ნაწილში, დაგეგმილია მეტროსადგურების რეაბილიტაცია და ავტობუსების სამარშრუტო ქსელის დახვეწა-გაფართოებაც. რაც შეეხება კონკრეტულად ავტობუსების პარკის განახლებას, მერია აქტიურად მუშაობს ამ საკითხზე და კონკრეტული შედეგების შესახებ საზოგადოებას ეცნობება“, - განაცხადა დავითულიანმა.
თბილისის მომავალი წლის ბიუჯეტის პროექტით გათვალისწინებული პროგრამების წადგენისას საკრებულოს წევრმა ასევე განაცხადა, რომ 2018 წლის ბიუჯეტის პროექტში 88 მლნ ლარამდეა გაზრდილი თანხები ქალაქის ეკოლოგიური მდგომარეობის გაუმჯობესებისთვის.
მისი თქმით, ამ სახსრებით იგეგმება საყოფაცხოვრებო ნარჩენების გადამუშავების სრულყოფა და მასშტაბური გამწვანებითი სამუშაოები.
დავითულიანის ინფორმაციით, თბილისის ყველა რაიონში მულტიფუნქციური, ახალგაზრდული ცენტრების შექმნა იგეგმება.
„თქვენ იცით, ჩვენი გუნდი წინასაარჩევნოდ აანონსებდა, რომ თბილისის ყველა რაიონში შეიქმნებოდა კულტურის, განათლებისა და სპორტის, მულტიფუნქციური, ახალგაზრდული ცენტრები. 2018 წელს გათვალისწინებულია 2 ასეთი ცენტრის მშენებლობა და სამის პროექტირება“, - განაცხადა დავითულიანმა.
ნინო ექვთიმიშვილი