პოლიტიკა
ადრე თუ გვიან რუსეთს მოუწევს თავისი დესტრუქციული პოლიტიკის შეცვლა საქართველოსთან მიმართებაში - ზურაბ აბაშიძე
რუსეთთან ურთიერთობის საკითხებში პრემიერის სპეციალური წარმომადგენელი, ზურაბ აბაშიძე საერთაშორისო სამართლის იგნორირებად აფასებს აფხაზეთში რუსეთის საგარეო უწყების ხელმძღვანელის, სერგეი ლავროვის ვიზიტს.
,,რუსეთი ცდილობს დააკანონოს ის ე.წ. ახალი რეალობა, რომელიც შეიქმნა აფხაზეთსა და ცხინვალის რეგიონში 2008 წლის ომის შემდეგ. რა თქმა უნდა, ეს გახლავთ საერთაშორისო სამართლის უხეში ხელყოფა, იგნორირება. საერთაშორისო თანამეგობრობა ცნობს საქართველოს ტერიტორიულ მთლიანობას. ჩვენ გავაკეთებთ შესაბამის განცხადებებს ყველგან, სადაც ხელი მიგვიწვდება.
ადრე თუ გვიან რუსეთს მოუწევს თავისი დესტრუქციული პოლიტიკის შეცვლა საქართველოსთან მიმართებაში’’, - აცხადებს ზურაბ აბაშიძე.
ცნობისათვის, დღეს, რუსეთის საგარეო საქმეთა მინისტრი სერგეი ლავროვი ოკუპირებულ აფხაზეთში ჩადის. ლავროვი აფხაზეთში ორი დღე დარჩება და შეხვდება ე. წ. პრეზიდენტს და ე. წ. საგარეო საქმეთა მინისტრს, ასევე დაესწრება რუსეთის "საელჩოს" ახალი შენობის გახსნას.
ნინო ექვთიმიშვილი