საზოგადოება

ალეკო ელისაშვილი და დავით ზურაბიშვილი მერიას მოუწოდებენ, რომ სითი პარკთან ხელშეკრულება გაწყვიტოს

თბილისის საკრებულოს დამოუკიდებელი დეპუტატი ალეკო ელისაშვილი და ფრაქცია რესპუბლიკელების წევრი, დავით ზურაბიშვილი, მერიას მიმართავენ, რომ მან სითი პარკთან არსებული ხელშეკრულება გაწყვიტოს და 2017 წლის დედაქალაქის ბიუჯეტში ჯარიმის თანხა განსაზღვროს.

როგორც ელისაშვილმა საკრებულოში ბრიფინგზე განაცხადა, მათ მერიისგან ოფიციალური ინფორმაცია გამოითხოვეს იმის შესახებ, თუ რა შემოსავალი მიიღო მერიამ ბოლო ორი წლის განმავლობაში სითი პარკის მომსახურებისგან, და რა შემოსავალი ჰქონდა კომპანიას ამავე პერიოდში.

„თბილისის მერიის მიერ მოწოდებულ ინფორმაციაზე დაყრდნობით არის კალკულაცია გაკეთებული. იქ წერია, რომ ორი წლის განმავლობაში თბილისის მერიამ მიიღო, 18 245 954 ლარი. კალკულაცია მარტივია 40/60%-ის პრინციპით, ხელშეკრულების მიხედვით დავიანგარიშეთ. ასეთი მონაცემია, რომ ორი წლის განმავლობაში სითი-პარკმა ამოიღო 62 მილიონი ლარი. აქედან 18 მილიონი გადაუხადა მერიას, 43 მილიონი, თითქმის 44 მილიონი წაიღო სახლში, ისე რომ ამ ორი წლის განმავლობაში ერთი სადგომიც არ შეუქმნია“,-აღნიშნა ელისაშვილმა.

ელისაშვილი აღნიშნავს, რომ სითი პარკს მერიასთან კონტრაქტი 2025 წლამდე აქვს გაფორმებული, რაც იმას ნიშნავს, რომ თუ ასე გაგრძელდა, კომპანია მოსახლეობის ჯიბეებიდან კიდევ 270 მილიონ ლარს ამოიღებს.

„ჩვენ ვთავაზობთ თბილისის მერიას, რომ გაწყვიტოს კონტრაქტი სითი პარკთან. 2017 წლის ბიუჯეტში ჩაიდოს პირგასამტეხლოს თანხა 25 მილიონი ლარი, რომელიც ჩვენ სითი პარკს უნდა გადავუხადოთ და გავწყვიტოთ ურთიერთობა ამ კომპანიასთან. პარკირება უნდა იყოს მუნიციპალური სერვისი და მერია უნდა მართავდეს მას ერთი წლის მანძილზე. შემდეგ შეიძლება ეს ვადა ან გახანგრძლივდეს, ან ახალი ტენდერი გამოცხადდეს. შემოსული თანხა კი უნდა მოხმარდეს დედაქალაქის პარკირების ინფრასტუქტურის შექმნას“, - განაცხადა ალეკო ელისაშვილმა.

მონიკა დავლიანიძე