კომენტარი
ანტიტერორისტული ოპერაციის გამოძიებაში FBI-ის ექსპერტები ჩაერთვნენ - იან კელი
საქართველოში ამეირკის ელჩი იან კელი ადასტურებს ინფორმაციას, რომ 22 ნოემბრის ანტიტერორისტული ოპერაციის გამოძიებაში ამერიკის ფედერალური საგამოძიებო ბიუროს (FBI-ის) ექსპერტები არიან ჩართული.
ამასთან, ელჩი აღნიშნავს, რომ ქართულ მხარეს ტექნიკური დახმარება ამერიკამ შესთავაზა.
იან კელი განმარტავს, რომ გამომდინარე იქიდან, რომ საქართველო ამერიკის პარტნიორია, მნიშვნელოვანია ქვეყნებმა ერთმანეთს ინფორმაცია გაუზიარონ, ითანამშრომლონ.
„აღნიშნულ გამოძიებასთან დაკავშირებით ჩვენ შევთავაზეთ დახმარება, ტექნიკური დახმარება. ჩვენ ამას უკვე უზრუნველვყოფთ. ეს ის საკითხია, რომელიც ყველა ჩვენთაგანს ეხება. ეს საერთაშორისო ტერორიზმის საკითხია. საქართველო ჩვენი პარტნიორია. ჩვენ მზად ვართ საქართველოს ნებისმიერი სახის დახმარება გავუწიოთ. მნიშვნელოვანია, რომ ჩვენ გავუზიაროთ ერთმანეთს ინფორმაცია, ვითანამშრომლოთ. ეს ძალიან მნიშვნელოვანი საკითხია, რომელზეც ჩვენ ერთად ვმუშაობთ. მოხარული ვარ, რომ უსაფრთხოების კუთხით საქართველოსა და ამერიკას შორის თანამშრომლობა პროდუქტიულია“, - განმარტა იან კელიმ.
მონიკა დავლიანიძე