საზოგადოება

არ მინდა, ვიყო გათანაბრებული გიგა ბოკერიასთან და „რუსთავი 2“-თან - ნაირა გელაშვილმა ომბუდსმენს ტოლერანტობის სიგელი დაუბრუნა

მწერალმა და კავკასიური სახლის ხელმძღვანელმა - ნაირა გელაშვილმა სახალხო დამცველს ტოლარანტობის კულტურის განვითარებაში შეტანილი წვლილისთვის მიღებული სიგელი დაუბრუნა. ამ ფორმით გელაშვილმა გააპროტესტა, რომ სახალხო დამცველთან არსებულმა რელიგიათა საბჭომ 16 ნოემბერს იგივე ჯილდო გადასცა „ევროპული საქართველოს“ ერთ-ერთ ლიდერ გიგა ბოკერიასა და ტელეკომპანია „რუსთავი 2“-ს.

ტოლერანტობის სიგელი ნაირა გელაშვილმა რამდნეიმე წლის წინ მიიღო.

„როდესაც იმავე ტოლერანტობის ჯილდოს, რაც ნიშნავს სიკეთეს, კეთილშობილებას, ჩაგრულთა გამოქომაგებასა და ა.შ, აძლევენ სისხლის სამართლის დამნაშავეებს, ბოტროტმოქმედებს, რომლებსაც უამრავი დანაშაული აქვთ ჩადენილი, ჩვენ უკვე აღარ გვინდა, მათთან ვიყოთ გათანაბრებულები. მე ვგულისხმობ გიგა ბოკერიას, მე ვგულისხმობ რუსთავი 2-ს, რომელიც იყო ამ ბოროტების, სიცრუის კონვეიერი“, -თქვა გელაშვილმა.

ომბუდსმენთან არსებული რელიგიათა საბჭოს თავმჯდომარის, ბექა მინდიაშვილის განმარტებით, ეს საკითხი სახალხო დამცველს არ ეხება, რადგან ის არ ერევა რელიგიათა საბჭოს გადაწყვეტილებებში.

„რელიგიათა საბჭო აბსოლუტურად დამოუკიდებლად იღებს გადაწყვეტილებებს. სახალხო დამცველს არ აქვს არანაირი საშუალება, ჩაერიოს წესდების მიხედვით რელიგიათა საბჭოს გადაწყვეტილებებში . ყოველწლიურად ის აჯილდოვებს ტოლერანტობის ქომაგებს , იქნება ეს არასამათავრობო ორგანიზაცია , მედია, პოლიტიკოსი, საჯარო მოხელე, ან კონკრეტული პიროვნება და აქვს შესაბამისი კრიტერიუმები , რელიგიური და ეთნიკური უმცირესობების მიმართ მხარდაჭერისა და რელიგიის დაცვისა და ტოლერანტობის კულტურის განვითარების თვალსაზრისით“, -თქვა მინდიაშვილმა.

ანა მებურიშვილი