კომენტარი
არ უნდა დავუშვათ რუსეთის პროვოკაციებზე წამოგება - ქეთევან ციხელაშვილი
ჩვენ არ უნდა დავუშვათ რუსეთის პროვოკაციებზე წამოგება, რამდენადაც ჩვენი ქვეყნისთვის მშვიდობა სასიცოცხლოდ მნიშვნელოვანი ინტერესია, - განაცხადა შერიგებისა და სამოქალაქო თანასწორობის საკითხებში სახელმწიფო მინისტრმა, ქეთევან ციხელაშვილმა მთავრობის სხდომის შემდეგ.
მისი შეფასებით, რუსეთის პრეზიდენტ ვლადიმერ პუტინის მოსალოდნელი ვიზიტი ოკუპირებულ აფხაზეთში და თარიღი, 8 აგვისტო, რომელიც ამ ვიზიტისთვის შეირჩა, არ არის შემთხვევითი, ვინაიდან ეს არის საქართველოს ტერიტორიების ღია ოკუპაციის 9 წლისთავი.
„ეს ჯდება იმ პროვოკაციების რიგში, რომელსაც ადგილი აქვს თითქმის ყოველდღიურად - ეს არის დაკავებები, გადაადგილების შეზღუდვა, ბარიკადები და ა.შ. მაგრამ ჩვენი ხაზი გახლავთ იმგვარი, რომ ჩვენ არ უნდა დავუშვათ ამ პროვოკაციებზე წამოგება. ჩვენი ქვეყნისთვის მშვიდობა არის სასიცოცხლოდ მნიშვნელოვანი ინტერესი და ამოცანა იმისთვის, რომ განვვითარდეთ და შევძლოთ მშვიდობიანი გზით, კონსტრუქციული პოლიტიკით კონფლიქტის სრულმასშტაბიანი მოგვარება.
მანამდე კი, ჩვენი ხაზი ასევე არის, ვიზრუნოთ კონფლიქტით დაზარალებულ მოსახლეობაზე და განვავითაროთ ჩვენი პოლიტიკა შერიგების მიმართულებით. ჩვენ ოკუპაციას ვუპირისპირდებით სწორედ მშვიდობით, ეკონომიკური და დემოკრატიის განვითარებით და სამშვიდობო პოლიტიკით, რომელიც დარწმუნებული ვარ, აუცილებლად მოიტანს შედეგებს“, - განაცხადა ციხელაშვილმა.
ნინო ექვთიმიშვილი