საზოგადოება
„არა ჩადებას“ აქციაზე, სომბოლურად, ჯიბეებს ამოვიკერავთ - ზვიად კუპრავა
შინაგან საქმეთა სამინისტროსთან, 14:00-ზე საპროტესტო აქცია სახელწოდებით „არა ჩადებას“ გაიმართება.
როგორც აქციის ორგანიზატორები აცხადებენ, სამინისტროსთან ჯიბეების სიმბოლური ამოკერვა მოხდება, იმის ნიშნად, რომ „ხელისუფლებამ ადამიანებს ჯიბეებში ნარკოტიკული საშუალება არ ჩაუდოს“.
„ეს იქნება აქცია, სამოქალაქო პროტესტი იმ დანაშაულებრივი ქმედებების და მიდგომების წინააღმდეგ, რომელსაც ატარებს ხელისუფლება შინაგან საქმეთა სამინისტროს ხელით, ჩვენი მეგობრების, ჩვენი ძმების, ჩვენი შვილების, მამების და ჩვენი თანამოქალაქეების წინააღმდეგ. ეს პროტესტი იქნება გზავნილი ხელისუფლების მიმართ. ჩვენ პროტესტის ნიშნად, სიმბოლურად ამოვიკერავთ ჯიბეებს და ვივლით ასე ჯიბეამოკერილები, ვიდრე ეს ხელისუფლება არ შეწყვეტს მსგავს დანაშაულებრივ ქმედებებს საკუთარი მოქალაქეების წინააღმდეგ“,-განმარტა „სამართალდამცველთა რეფორმირების ცენტრის“ ხელმძღვანელმა ზვიად კუპრავამ.
საპროტესტო აქციაზე მისვლას საქართველოს პრეზიდენტის შვილი ანა მარგველაშვილიც გეგმავს, რომელიც აცხადებს, რომ სწორედ ამ ფორმით, პრეზიდენტის ოჯახზე ზეწოლის მიზნით, მისი ოჯახის წევრებისა და მეგობრების შევიწროებას ახორციელებენ.
მონიკა დავლიანიძე