პოლიტიკა

არავითარი პოლიტიკური კრიზისი მარტვილში არ არის - მარტვილის მერი

მარტვილის მერმა ალექსანდრე გრიგალავამ უარყო მარტვილის მაჟორიტარი დეპუტატისა და აგრარულ საკითხთა საპარლამენტო კომიტეტის თავმჯდომარის, ოთარ დანელიას განცხადება, რომ მუნიციპალიტეტში „მწიფდება პოლიტიკური კრიზისი“, რომელშიც ჩართულია „ქართული ოცნების“ რამდენიმე წევრი. ამის შესახებ გრიგალავამ droa.ge-ს განუცხადა.

გრიგალავასთვის გაუგებარი აღმოჩნდა, რის საფუძველზე გააკეთა დანელიამ ეს განცხადება.

„არ მომისმენია ოთარ დანელიას განცხადება. არავითარი პოლიტიკური კრიზისი მარტვილში არ არის, ჩვეულებრივი მუშა პროცესი გვაქვს, როგორც ყოველთვის. დანარჩენი, რაში ხედავს პოლიტიკურ კრიზისს, რა ფაქტების გამო აკეთებს ბატონი ოთარი ამ განცხადებას, მას უნდა ჰკითხოთ, ამაზე პასუხს მე ვერ გაგცემთ“, - თქვა მარტვილის მერმა.

გრიგალავამ უარყო დანელიასთან და ადგილობრივ ხელისუფლებასთან შესაძლო უთანხმოება.

„ჩემი მხრიდან არანაირი დაძაბული ურთიერთობა არ მაქვს. ყოველთვის მზად ვართ ბატონ ოთართან თანამშრომლობისთვის. რადგან ასე გადაწყვიტა, რომ დაძაბული სიტუაციაა და ამას თვითონ იძახის, მაშინ თვითონვე უნდა გასცეს პასუხი, რას გულისხმობს. ჩემგან მას არანაირი დაძაბული სიტუაცია არ აქვს. არც პარტიის წევრებთან და არც უმრავლესობასთან. რატომ ფიქრობს ბატონი ოთარი ასე, არ ვიცი. ძალიან გამიკვირდა ეს განცხადება, ვინაიდან ის სხვა კუთხით უნდა იქცეოდეს მუნიციპალიტეტთან მიმართებით და ეს განცხადება ძალიან გასაოცარია“, -უპასუხა დანელიამ გამოცემას.

მან პასუხი ვერ გასცა ჟურნალისტის შეფასებას, რომ ეს განცხადება ჰგავდა ადგილობრივი ხელისუფლების საქმიანობაში ჩარევას.

რაც შეეხება პარტიის ადგილობრივ ორგანიზაციას, გრიგალავამ განაცხადა, რომ შესაძლო განხეთქილების შესახებ ეცოდინებოდა.