პოლიტიკა

არსებობს ფსევდოლიბერალური ძალები, რომლებიც თანაბრად ებრძვიან საქართველოსა და აშშ-ის მოქმედ ხელისუფლებებს - ირაკლი კობახიძე

საქართველოს პარლამენტის თავმჯდომარის, ირაკლი კობახიძის განცხადებით, ქვეყანაში მოქმედებენ ფსევდოლიბერალური ძალები, რომლებიც ებრძვიან საქართველოსა და აშშ-ის ხელისუფლებას. მსგავს ძალებს შორის კობახიძემ დაასახელა NDI-ის თბილისის ოფისი.

„არსებობს ე.წ. ლიბერალური, უფრო სწორად ფსევდოლიბერალური ძალები, რომლებიც თანაბრად ებრძვიან საქართველოსა და აშშ-ის მოქმედ ხელისუფლებებს, ამის საუკეთესო ილუსტრაციაა NDI-ის თბილისის ოფისის ხელმძღვანელობა, რომლისთვისაც საქართველოში საკუთარი ხელისუფლების შეურაცხყოფა ჩვეულებრივი მოვლენაა. მინდა აღვნიშნო, რომ ამ ბრძოლას არავითარი საერთო არ აქვს ლიბერალიზმთან, ლიბერალურ ღირებულებებთან ამ სიტყვის კლასიკური გაგებით. ჩვენი ხელისუფლება არის სწორედ რომ ლიბერალური ხელისუფლება და ყველაზე ლიბერალურიც კი საქართველოს უახლეს ისტორიაში. ჩვენ ვეყრდნობით ისეთ ღირებულებებს, როგორიცაა - დემოკრატია, სამართლებრივი სახელმწიფო, ადამიანის უფლებების განუხრელი დაცვა, თანასწორობა და შემწყნარებლობა. ჩვენთვის მიუღებელია ფსევდოლიბერალიზმი და ის ძალები, რომლებიც უპირისპირდებიან ჩვენს ეროვნულ თვითმყოფადობას, ტრადიციებს და ქართულ ეკლესიებს, რომლებიც ასევე უპირისპირდებიან შესაბამის ღირებულებებს აშშ-ში. მინდა აღვნიშნო, რომ საქართველოში აუცილებლად გაგრძელდება დემოკრატიული განვითარების პროცესი, რაც საბოლოოდ უზრუნველყოფს ევროპული სტანდარტების დემოკრატიული სისტემის ჩამოყალიბებას“, - განაცხადა კობახიძემ დღევანდელ ბრიფინგზე, რომელიც ეძღვებოდა გარდამავალ ეტაპზე მყოფი სახელმწიფოების შესახებ Freedom House-ის ბოლო ანგარიშს.