პოლიტიკა

არცერთი დღე არ შეწყვეტილა მუშაობა ლიბერალური ნარკოპოლიტიკის შესახებ კანონპროექტზე - მამუკა მდინარაძე

საპარლამენტო ფრაქცია „ქართული ოცნების“ თავმჯდომარე, მამუკა მდინარაძე გამოეხმაურა მედიის წარმომადგენელთა მიმართვას, რომლითაც ითხოვენ პარლამენტისგან ნარკოპოლიტიკის ლიბერალიზაციის პროცესის დაჩქარებას.

მდინარაძის მტკიცებით, ლიბერალური ნარკოპოლიტიკის შესახებ კანონპროექტზე მუშაობა არ შეწყვეტილა, თუმცა უმრავლესობაში ამ საკითხზე ერთიანი პოზიცია ვერ ჩამოყალიბდა.

„მინდა, დაგარწმუნოთ, რომ არცერთი დღე არ შეწყვეტილა მუშაობა და შეხვედრები. ვხვდებით სხვადასხვა ჯგუფს. იცით, რომ რადიკალურად განსხვავებული მოსაზრებები არსებობს ამ თემაზე, მათ შორის საპარლამენტო უმრავლესობაშიც. ჩვენც გვაქვს პოზიციები დასაახლოებელი – კერძოდ, კანონმდებლობა, ერთი მხრივ, უნდა უზრუნველყოფდეს ლიბერალურ მიდგომას ნარკომომხარებლებთან და, მეორე მხრივ უნდა ვიყოთ მკაცრები გამსაღებლებთან. ეს არის ძალიან დიდი გამოწვევა“, – აღნიშნა მდინარაძემ.

მან იმედი გამოთქვა, რომ ინტენსიური მუშაობის შედეგად მოხდება მიდგომების გამიჯვნა ნარკომომხმარებლებისა და გამსაღებლების მიმართ.

„დიფერენციაცია უნდა გაკეთდეს მომხმარებლებსა და გამსაღებლებს შორის. საბოლოო ჯამში, ამ ინტენსიური მუშაობის შედეგად ძალიან მალე მივალთ იქამდე, რომ ეს გამიჯვნა და ნარკოპოლიტიკის შემუშავებაც მოხდება სწორად“,- თქვა დეპუტატმა.

მედიის წარმომადგენლებმა პირველი არხის ყოფილი თანამშრომლის, მამუკა ბერძენიშვილის შეწყალების თხოვნით საქართველოს პრეზიდენტს მიმართეს. მათ მოუწოდეს პარლამენტს, შესაბამის კანონში შევიდეს ცვლილებები და შეიცვალოს რეპრესიული ნარკოპოლიტიკა.