საზოგადოება

ასეთ შემთხვევებში ზიანის ანაზღაურება მთავრობის ფუნქციას არ განეკუთვნება - დავით ნარმანია

თბილისის მერი, დავით ნარმანია გამოეხმაურა მთავრობის ადმინისტრაციასთან „ბავშვთა სამყაროს“ მოვაჭრეების მიერ გამართულ აქციას. მისი თქმით, მერიამ თავისი შესაძლებლობებიდან გამომდინარე, მაქსიმალურად დაეხმარა მოვაჭრეებს.

მან ისაუბრა, რომ მერიამ მოვაჭრეებს კომერციულ ბანკებთან შუამავლობა გაუწია.

„ეს იყო გარკვეული შუამავლის როლი კომერციულ ბანკებთან მიმართებაში. მოგეხსენებათ, გარკვეული ნაბიჯები გადაიდგა კომერციული ბანკების მხრიდან, პროცესში ჩართული იყო ეროვნული ბანკი, ბანკების ასოციაცია და მოხდა გადასახდელი თანხების გადავადება“, - განაცხადა ნარმანიამ მთავრობის სხდომის დასრულების შემდეგ.

მან ასევე თქვა, რომ მერიის შუამდგომლობით მოვაჭრეებს ფართები გამოუყვეს მუშაობის გასაგრძელებლად.

„ფინანსთა სამინისტრომ შეიმუშავა სპეციალური ნორმა, რომლის მიხედვითაც უნდა მოხდეს იმ ზიანის ჩამოწერა, რომელიც მათ მიადგათ, რათა არ დაიბეგროს გადასახადებით. გარკვეული შეღავათები გაკეთდა სალარო აპარატებთან დაკავშირებით. ჩვენ ვიკისრეთ შუამავლის ფუნქცია ბაზრობების ასოციაციასთან და მათ გარკვეული ფართები გამოყვეს რამდენიმეთვიანი საშეღავათო პერიოდით, რათა დაზარალებულები განთავსდნენ ამ ფართებში“,- თქვა ნარმანიამ.

თბილისის მერის თქმით, ზიანის ანაზღაურება მთავრობის კომპეტენციაში არ შედის და ეს უნდა ყოფილიყო მოგვარებული ბაზრობის ადმინისტრაციასა და მოვაჭრეებს შორის.

„ძალიან ცუდია ის, რომ მათ შორის [ბაზრობის ადმინისტრაციასა და მოვაჭრეებს შორის] ხელშეკრულება მხოლოდ ფორმალურ ხასიათს ატარებდა - არ იყო დაზღვევასთან დაკავშირებული მექანიზმები გათვალისწინებული. გარდა ამისა, ზუსტი ზიანის ოდენობის დადგენაც შეუძლებელია. ძალიან ბევრი პრობლემური საკითხი არსებობს ამასთან დაკავშირებით და მიგვაჩნია, რომ მთავრობის ფუნქციას არ განეკუთვნება ასეთ შემთხვევაში მიყენებული ზიანის ანაზღაურება“, - განაცხადა დავით ნარმანიამ.

შეგახსენებთ, რომ დღეს მთავრობის სხდომის პარალელურად „ბავშვთა სამყაროში“ გაჩენილი ხანძრის შედეგად დაზარალებულმა მოვაჭრეებმა საპროტესტო აქცია გამართეს. ისინი ითხოვენ ზარალის ანაზღაურებასა და პრემიერ-მინისტრთან შეხვედრას.

სავაჭრო ცენტრ „ბავშვთა სამყაროში“ ხანძარი 30 იანვრის დილას გაჩნდა. ფაქტზე გამოძიება ამ დრომდე მიმდინარეობს.

ანა მებურიშვილი