პოლიტიკა
აშშ-ის პრეზიდენტმა საქართველოს პრემიერსა და ქვეყნის მოსახლეობას პირველი დემოკრატიული რესპუბლიკის 100 წლის იუბილე წერილობით მიულოცა
აშშ-ის პრეზიდენტმა დონალდ ტრამპმა საქართველოს პრემიერ-მინისტრ გიორგი კვირიკაშვილსა და ქართველ ხალხს პირველი დემოკრატიული რესპუბლიკის 100 წლის იუბილე მიულოცა.
„ძვირფასო ბატონო პრემიერ-მინისტრო!
პირადად თქვენ და ქართველ ხალხს ვულოცავ დამოუკიდებლობისა და პირველი რესპუბლიკის საუკუნოვან იუბილეს. საქართველო უძველესი და ულამაზესი ისტორიის მქონე შესანიშნავი ქვეყანაა. მას ბევრჯერ შეუტანია წვლილი დასავლურ კულტურაში - მათ შორის, მუსიკაში, არქიტექტურასა და კულინარიაში.
თქვენი ჯარისკაცები გაბედულად იბრძვიან და თავს სწირავენ ჩვენს ჯარისკაცებთან ერთად ავღანეთსა და ერაყში.
ამერიკის შეერთებული შტატები განუხრელად უჭერს მხარს საქართველოს ევროატლანტიკურ მომავალს, ტერიტორიულ მთლიანობასა და სუვერენიტეტს.
ჩვენს ორ დიდებულ ქვეყანას შორის პარტნიორობის გაღრმავების პირობებში ველი ჩვენი ერების კეთილდღეობისა და უსაფრთხოების უზრუნველყოფის შესაძლებლობათა გამოვლენასა და გამოყენებას“, - წერია ტრამპის მისალოც წერილში, რომელიც საქართველოს პრემიერ-მინისტრმა მიიღო.