პოლიტიკა

აშშ-ის სახელწმიფო დეპარტამენტის წლიურ ანგარიშში ოკუპირებულ ტერიტორიებზე შექმნილ მდგომარეობაზეა ყურადღება გამახვილებული

აშშ-ის სახელმწიფო დეპარტამენტის მიერ გამოქვეყნებულ ადამიანთა უფლებების მდგომარეობის შესახებ 2017 წლის ანგარიშში ყურადღება გამახვილებულია საქართველოს ოკუპირებულ ტერიტორიებზე შექმნილ ვითარებაზე.

ნათქვამია, რომ აფხაზეთისა და ცხინვალის რეგიონის სეპარატისტული მთავრობები სარგებლობენ რუსეთის რამდენიმე ათასი სამხედროს მხარდაჭერით. თავის მხრივ, რუსი სამხედროები ზღუდავენ ადგილობრივი მოსახლეობის გადაადგილების უფლებას.

ანგარიშის თანახმად, დე-ფაქტო ხელისუფლებები ზღუდავენ უმეტესწილად ეთნიკური ქართველების უფლებებს, იქნება ეს ხმის მიცემა, სხვადასხვა სახის ჩართულობა ადგილობრვი პოლიტიკურ პროცესებში, ბიზნესის რეგისტრაცია, მოგზაურობა თუ ქართულ ენაზე სწავლა.

აღნიშნულია, რომ 300 ათას ლტოლვილსა და ადგილნაცვალ პირს არ აძლევენ საშუალებას, დაუბრუნდნენ თავიანთ საცხოვრებელ ადგილებს და აგრეთვე, შელახულია მათი ქონების უფლება.

ანგარიშში ხაზგასმულია საოკუპაციო ხაზთან შექმნილი მდგომარეობა, კერძოდ ხელოვნური ბარიერებისა და მავთუხლართების გავლება, რაც უარყოფითად მოქმედებს საზღვრისპირა რაიონებზე მცხოვრებ მოსახლეობაზე.

აშშ-ის სახელწმიფო დეპარტამენტის ანგარიშში წერია, რომ დე-ფაქტო ხელისუფლებები საერთაშორისო ჰუმანიტარულ ორგანიზაციებს უზღუდავენ წვდომას საქართველოს ოკუპირებულ ტერიტორიებზე.

რაც შეეხება გიგა ოთხოზორიას გახმაურებულ მკვლელობას, ანგარიშის თანახმად, აფხაზეთის საოკუპაციო რეჟიმმა შეაჩერა საქმის მსვლელობა, თუმცა ქართული მხარის ძალისხმევის შედეგად ოთხოზორიას მკვლელობაში ბრალდებული რაშიდ კანჯი ოღლი ინტერპოლის წითელი ცირკულარით იძებნება.