პოლიტიკა

აზრს მოკლებულია სტრასბურგში ულტიმატუმების მოსმენა - ირაკლი სესიაშვილი

პარლამენტის თავდაცვისა და უშიშროების კომიტეტის თავმჯდომარის, ირაკლი სესიაშვილის განცხადებით, მისთვის აზრს მოკლებულია სტრასბურგში ოპოზიციასთან დისკუსიის გამართვა საკონსტიტუციო ცვლილებებთან დაკავშირებით.

სესიაშვილმა აღნიშნა, რომ ოპოზიცია მმართველ გუნდს ულტიმატუმის ენით ელაპარაკება და აფერხებს კონსესუსის მიღწევას.

„საპასუხოდ ჩვენ ვხედავთ არა კონკრეტიკას, არამედ ულტიმატუმის ენით საუბარს, პირდაპირ მიზანმიმართულ მცდელობას, რომ პოლარიზება მოხდეს სიტუაციის, რომ ვერ წავიდეთ შეთანხმებაზე. ამიტომ, მე აზრს მოკლებულად ვხედავ სტრასბურგში ულტიმატუმების მოსმენას. ეს ქვეყნის ინტერესებისთვის სასარგებლო არ არის. ჩვენ მაქსიმალურად უნდა შევეცადოთ, რომ ის კონსტიტუცია, რომელიც ჩვენ ექსპერტებთან და სხვადასხვა პოლიტიკურ ძალასთან ერთად შევიმუშავეთ, იყოს ქვეყნის ინტერესებზე მორგებული და არა ის, რომ ულტიმატუმებით ვიღაცამ საკუთარი ინტერესები გაიტანოს", - განაცხადა სესიაშვილმა.

მმართველმა გუნდმა განცხადება გაავრცელა, რომლის თანახმად, მისი წარმომადგენლები სტრასბურგში დაგეგმილ შეხვედრაზე არ წავლენ. საპარლამენტო უმრავლესობამ შეხვედრის ჩაშლაში ოპოზიცია დაადანაშაულა. მმართველი გუნდის აზრით, ოპოზიციამ დიალოგი ჩიხში შეიყვანა.

შეგახსენეებთ, ვენეციის კომისიის თავმჯდომარემ ჯანი ბუკიკიომ ქართულ ოპოზიციურ პარტიებსა და მმართველ გუნდს 6 სექტემბერს, სტრასბურგში დაპატიჟა საკონსტიტუციო ცვლილებებზე სამსჯელოდ.

ანა მებურიშვილი