კომენტარი
ბიზნესთან ურთიერთობაში შეცდომები დავუშვით - ზურაბ ადეიშვილი
„ბიზნესთან დაკავშირებით სერიოზული შეცდომა იყო ბიზნესმენის მიმართ წინასწარი პატიმრობის გამოყენება. ეს იყო ყველაზე დიდი შეცდომა, რაც ჩვენ არ უნდა გაგვეკეთებინა“, - განაცხადა იუსტიციის ყოფილმა მინისტრმა ზურაბ ადეიშვილმა რუსთავი 2-ის ყოფილ გენერალურ დირექტორთან, ნიკა გვარამიასთან ინტერვიუში.
ბიზნესის ტერორთან დაკავშირებით ზურაბ ადეიშვილი ამბობს, რომ წინა ხელისუფლების დროს არსებობდა ე.წ. შორთკარტები, რაც მისი განმარტებით იმას ნიშნავს, რომ ბიზნესის წარმომადგენლის დასჯის ნაცვლად მათ ინვესტირების გაკეთებას სთავაზობდნენ: „ის ფული, რაც შენ მოიპარე და წაიღე სახლში, ამ ფულის რაღაც ნაწილი მოახმარე საზოგადოებრივ სიკეთეს“, - განაცხადა ადეიშვილმა, თუმცა დასძინა, რომ ის არ ამართლებს მაშინდელ პროცედურებს.
მისი თქმით, უმჯობესი იქნებოდა დამრღვევი კომპანიების მიმართ სახელმწიფოს ჰქონოდა სხვა პოლიტიკა - კერძოდ, ასეთი კომპანიები დაყადაღებულიყო, მათი მფლობელების მიმართ კი შესაბამისი სასჯელები გამოეყენებინათ.
მისივე განმარტებით, საზოგადოებაში განსაკუთრებულ ვნებათაღელვას იწვევდა ასევე მცირე ბიზნესის მიმართ მკაცრი დამოკიდებულება და დაჯარიმება მცირე დარღვევებზე: „პატარა მაღაზია რომ ჰქონდა, მაგალითად, ვიღაცას სოფელში და ჩეკის გარეშე [მუშაობდა]...ესეც შეცდომა იყო“, - განაცხადა ზურაბ ადეიშვილმა ნიკა გვარამიასთან ინტერვიუში, რომელიც ბუდაპეშტშია ჩაწერილი.