საზოგადოება

ბოლო 4 თვეში ქვეყნის ძირითადი ტელეარხების მიმართ მოსახლეობის ნდობა შემცირდა - NDI

ეროვნულ-დემოკრატიული ინსტიტუტის (NDI) კვლევის თანახმად, 2017 წლის დეკემბრის მაჩვენებელთან შედარებით მკვეთრად შემცირდა მოსახლეობის ნდობა ქვეყნის ძირითადი ტელეარხების მიმართ.

კითხვაზე „ყველაზე მეტად რომელ არხებს ენდობით პოლიტიკისა და მიმდინარე მოვლენების შესახებ სანდო ინფორმაციის მისაღებად?“ გამოკითხულთა 33%-მა ტვ „იმედი“ დაასახელა (2017 წლის დეკემბერში მას ენდობოდა გამოკითხულთა 46%), 27%-მა – „რუსთავი 2“ (4 თვის წინ ეს მაჩვენებელი 46%-ს შეადგენდა), ხოლო 4%-მა - საზოგადოებრივი მაუწყებლის პირველი არხი (წინა კვლევაში საზმაუს ენდობოდა გამოკითხულთა 9%). ტვ პირველის ნდობის მაჩვენებელი 4%-დან 2%-მდე შემცირდა, კვლევაში ვერ მოხვდა „მაესტრო“, რომელსაც 2017 წლის დეკემბერში გამოკითხულთა 3%-მა დაასახელა.

იმ პირთა რიცხვი, რომელიც არცერთ არხს არ ენდობა, 19%-დან 22%-მდე გაიზარდა.

კვლევის საველე სამუშაოები ჩატარდა 20 მარტი - 4 აპრილის პერიოდში, საქართველოს მასშტაბით (ოკუპირებული ტერიტორიების გამოკლებით), 2,194 პირისპირ ინტერვიუს წარმომადგელობითი შერჩევის საფუძველზე (გამოპასუხება 46%). კვლევა პირისპირ ინტერვიუს სახით ჩატარდა და მისი ცდომილება 2,2 პროცენტია.

კვლევა დიდი ბრიტანეთის მთავრობის UK aid-ის ფინანსური ხელშეწყობით ჩატარდა, საველე სამუშაოები კი CRRC-საქართველომ შეასრულა