საზოგადოება

ბრიტანეთის საელჩო თავის მოქალაქეებს თბილისში ვიზიტის შემთხვევაში სიფრთხილისკენ მოუწოდებს

დიდი ბრიტანეთის საელჩო ბრიტანეთის მოქალაქეებს საქართველოში გამგზავრების შემთხვევაში სიფრთხილისკენ მოუწოდებს.

დიპლომატიური წარმომადგენლობა რეკომენდაციებს თბილისში, 6 ოქტომბრისთვის დაგეგმილი საქართველო-უელსის საფეხბურთო მატჩზე დასწრების მსურველებისთვის ავრცელებს.

როგორც უწყების განცხადებაშია აღნიშნული, საქართველოში ზოგადად კრიმინალის დონე დაბალია, თუმცა დროდადრო, განსაკუთრებით საღამოს და ღამის საათებში შესაძლოა, ადგილი ჰქონდეს თავდასხმას, სექსუალური ძალადობისა და ძარცვის ფაქტებს.

უწყება მოუწოდებს ბრიტანეთის მოქალაქეებს, მოერიდონ ქუჩაში ღამის საათებში მარტო სიარულს და გადაადგილებისას თან არ იქონიონ დიდი თანხა, რადგან მათი თქმით, პერიოდულად, ხალხმრავალ ადგილებში ადგილი აქვს ძარცვას.

განცხადებაში საუბარია, ტაქსის მძღოლების მხრიდან სექსუალური ძალადობის რისკზეც.

გაფრთხილებების ჩამონათვლაში ნათქვამია, რომ თბილისში ხშირია ავტოსაგზაო შემთხვევები და საგზაო წესების დარღვევა.

კერძოდ, დიპლომატიური უწყება ბრიტანეთის მოქალაქეებს აფრთხილებს, რომ ზებრა-გადასასვლელები და შუქნიშნები არ არის იმის გარანტია, რომ ავტომობილები მოძრაობას შეწყვეტენ და ურჩევს, შეძლებისდაგვარად მიწისქვეშა გადასასვლელებით ისარგებლონ.

განცხადებაში, აღნიშნული ისიც, რომ ქალაქში საზოგადოებრივი ტუალეტები არ არის განთავსებული და ბრიტანელ მოქალაქეებს ბარების თუ კაფეების საპირფარეშოებით მოუწევთ სარგებლობა.

ბრიტანეთის საელჩო თავის მოქალაქეებს ასევე, მოუწოდებს გაითვალისწინონ, რომ თბილისის ქუჩები არ არის ადაპტირებული ეტლში მჯდომი შშმ პირებისთვის.

ნინო ექვთიმიშვილი