პოლიტიკა

ჩემი მოსკოვში ვიზიტის შემდეგ ლაპარაკი იყო არა ვიზების გამარტივებაზე, არამედ სავიზო რეჟიმის გაუქმებაზე - ნინო ბურჯანაძე

„ნინო ბურჯანაძე-დემოკრატიული მოძრაობის“ ლიდერის განცხადებით, მისი მოსკოვში ვიზიტის დროს, საქართველოსთან სავიზო რეჟიმის გაუქმებაზე იყო საუბარი.

ამის შესახებ ნინო ბურჯანაძემ აბაშიძე-კარასინის მორიგი შეხვედრის შეფასებისას მედიას განუცხადა.

„ლაპარაკი ურთიერთობის გამუმჯობესებაზე დიდი ხანია მიდის. ლაპარაკი ვიზების გამარტივებაზე ასევე იყო, თუმცა ჩემი მოსკოვში ვიზიტის შემდეგ ლაპარაკი იყო არა ვიზების გამარტივებაზე, არამედ სავიზო რეჟიმის გაუქმებაზე. ოღონდ ხელისუფლებამ რატომღაც ისევ დაიწყო ლაპარაკი ვიზების გამარტივებაზე“,-განაცხადა ბურჯანაძემ.

შეგახსენებთ, რომ გუშინ, პრაღაში აბაშიძე-კარასინის ფორმატში მორიგი შეხვედრა გაიმართა.

ზურაბ აბაშიძის განცხადებით, რუსეთის მხრიდან მიმდინარეობს მუშაობა იმისთვის, რათა მოხდეს სავიზო რეჟიმის შემდგომი გამარტივება. მისი თქმით, სავიზო რეჟიმის გაუქმებაზე საუბარი არ არის.

მონიკა დავლიანიძე